जगभरात दोन वर्षांहून अधिक काळ कोरोना महामारीचा कहर सुरू आहे. त्यामुळे केवळ आरोग्य संकटच निर्माण झाले नाही, तर पर्यटन क्षेत्रासह अर्थव्यवस्थेलाही मोठा फटका बसला. दुसरीकडे, आरोग्य सेवा क्षेत्र आणि त्याच्याशी संबंधित विभाग, विशेषतः औषधे आणि इतर वैद्यकीय उत्पादनांची बाजारपेठ वेगाने वाढली. नुकत्याच आलेल्या एका अहवालानुसार, मागील वर्षात देशात बनावट औषधे आणि वैद्यकीय उत्पादनांमध्ये वाढ झाली. (Increase in counterfeit drugs and medical products during Corona period)

कोरोनाच्या काळात बनावट औषधांचा बाजार वाढला
ऑथेंटिकेशन सोल्युशन्स प्रोव्हायडर्स असोसिएशन (ASPA) च्या नुकत्याच दिलेल्या अहवालानुसार, 2020 च्या तुलनेत 2021 मध्ये निकृष्ट आणि बनावट वैद्यकीय उत्पादनांच्या प्रकरणांमध्ये 47 टक्क्यांनी वाढ झाली आहे. अहवालात असेही म्हटले आहे की, बनावट औषधांची जी प्रकरणे समोर आली त्यातील बहुतांश प्रकरणे कोविड-19 (COVID-19) शी संबंधित आहेत. यामध्ये लस, औषधे, कोविड चाचणी किट, मास्क (Mask) आणि सॅनिटायझर इत्यादींचा समावेश होता.

गेल्या वर्षी बहुतांश राज्यांमध्ये बनावट औषधे सापडली
एएसपीएच्या अहवालानुसार, गेल्या वर्षी जेव्हा देशात कोविडची दुसरी लाट सुरू होती, तेव्हा 29 राज्यांपैकी 23 राज्यांमध्ये आणि 7 केंद्रशासित प्रदेशांमध्ये बनावट औषधांची (Medicines) प्रकरणे समोर आली होती. याविषयी संघटनेचे अध्यक्ष नकुल पसरिचा यांचे म्हणणे आहे की, 'गुन्हेगारांनी लोकांच्या गरजेचा फायदा घेत शक्य तितकी बनावट वैद्यकीय उत्पादने बाजारात आणली. ते पुढे म्हणाले, 'निम्न दर्जाची आणि खोटी वैद्यकीय उत्पादने वापरणे आरोग्यासाठी धोकादायक आहे.