पणजी: वास्को शहरातील विविध भागातून चोरी झालेल्या दुचाकी प्रकरणांची उकल करत पोलिसांनी कर्नाटकातील दोन युवकांना अटक केली आहे. पोलिसांनी दिलेल्या माहितीनुसार, अटक करण्यात आलेल्यांची नावे वैभव दत्तात्रय रणदिवे (१९) आणि अझरन इक्बाल शेख (१८) अशी आहेत. हे दोघेही कर्नाटक राज्यातील रहिवासी असून वास्को परिसरात येऊन दुचाकी चोरीच्या घटनांमध्ये सहभागी होते.

वास्को पोलिस ठाण्याच्या पथकाने मिळालेल्या गोपनीय माहितीच्या आधारे सापळा रचून या दोघांना ताब्यात घेतले. प्राथमिक चौकशीत त्यांनी वास्को शहरातील वेगवेगळ्या ठिकाणांहून तीन दुचाक्या चोरल्याची माहिती आहे.

या कारवाईनंतर पोलिसांनी दोघांना न्यायालयात हजर केले असता न्यायालयाने त्यांना ४ दिवसांची पोलिस कोठडी सुनावली. दरम्यान, या दोघांचा संबंध इतर चोरीच्या घटनांशीही आहे का याबाबत तपास सुरू आहे.

वास्को पोलिस निरीक्षकांनी सांगितले की, शहरात गेल्या काही दिवसांपासून दुचाकी चोरीच्या घटनांमध्ये वाढ झाली होती. नागरिकांना आपल्या वाहनांवर सुरक्षा लॉक बसवण्याचे आणि सार्वजनिक ठिकाणी वाहन पार्क करताना खबरदारी घेण्याचे आवाहन केले आहे.