दिल्ली विद्यापीठातील हिंदू कॉलेजचे सहयोगी प्राध्यापक रतन लाल (DU Professor Ratan Lal) यांना दिल्ली पोलिसांनी शनिवारी तीस हजारी न्यायालयात हजर केले. वाराणसीच्या ज्ञानवापी मशीद संकुलात शिवलिंग सापडल्याच्या दाव्यावरुन सोशल मीडियावर आक्षेपार्ह पोस्ट केल्याप्रकरणी अटक करण्यात आलेल्या रतन यांच्या खटल्याची सुनावणी करताना न्यायालयाने त्यांना जामीन मंजूर केला आहे.

दरम्यान, रतन लाल यांना शुक्रवारी रात्री अटक करण्यात आली. पोलिसांनी (Police) दिलेल्या माहितीनुसार, असोसिएट प्रोफेसर रतन लाल यांच्यावर भारतीय दंड संहिता कलम 153A (धर्म, जात, जन्मस्थान, निवासस्थान, भाषा इत्यादी कारणांवरून विविध गटांमध्ये शत्रुत्व वाढवणे) अंतर्गत गुन्हा दाखल करण्यात आला आहे.

खरं तर त्यांच्याविरोधात सर्वोच्च न्यायालयाचे वकील विनीत जिंदाल यांनी तक्रार दाखल केली होती. आपल्या तक्रारीत त्यांनी म्हटले आहे की, 'रतन लाल यांनी नुकतेच 'शिवलिंग'वरुन अपमानास्पद आणि चिथावणीखोर ट्विट केले होते. या प्रकरणाची दखल घेत पोलिसांनी कारवाई केली. मात्र आता न्यायालयाने (Court) त्यांना दिलासा दिला आहे.'