India China Clash: अरुणाचल प्रदेशमध्ये भारत आणि चीनच्या सैनिकांमध्ये चकमक झाली आहे. या चकमकीत दोन्ही देशांचे सैनिक जखमी झाल्याचे वृत्त आहे. तवांगजवळ नुकतीच ही हाणामारी झाली. भारतीय जवानांनी चीनला चोख प्रत्युत्तर दिले आहे. भारतीय लष्कराकडून अधिकृत निवेदनाची प्रतीक्षा आहे. ऑक्टोबर 2021 मध्ये अरुणाचल प्रदेशातील यांगसे येथे दोन्ही देशांच्या सैनिकांमध्ये वाद झाला होता.

दरम्यान, या चकमकीत भारताचे (India) 30 हून अधिक जवान जखमी झाले आहेत. अनेक चिनी सैनिकही जखमी झाले आहेत. कोणाची संख्या जास्त आहे? असे प्रश्न उपस्थित केले जात आहेत. या चकमकीनंतर शांतता प्रस्थापित करण्यासाठी भारताच्या कमांडर्सनी चीनच्या कमांडरसोबत फ्लॅग मीटिंग केली आहे.

दुसरीकडे, 15 जून 2020 च्या घटनेनंतर अशा प्रकारची ही पहिलीच घटना आहे. त्यानंतर लडाखच्या गलवान खोऱ्यात चिनी सैनिकांशी झालेल्या हिंसक चकमकीत 20 भारतीय जवान शहीद झाले होते. तर अनेक जण जखमी झाले होते. या चकमकीत चीनचे अनेक सैनिकही मारले गेले होते.

तसेच, अरुणाचल प्रदेशातील (Arunachal Pradesh) तवांग सेक्टरमधील एलएसी बाजूच्या काही भागात, दोन्ही बाजूकडून त्यांच्या दाव्याच्या मर्यादेपर्यंत गस्त घालतात. 2006 पासून हा ट्रेंड आहे. या भागात गस्त घालताना अनेकदा भारतीय आणि चिनी सैनिक आमने-सामने येतात. अरुणाचल प्रदेशात भारतीय आणि चिनी सैनिकांमध्ये हाणामारी होण्याची ही पहिलीच वेळ नाही. ऑक्टोबर 2021 मध्ये अशीच एक घटना घडली होती, जेव्हा काही चीनी सैनिकांना भारतीय सैनिकांनी यांगसे येथे काही तासांसाठी ताब्यात घेतले होते.