India Vs China: 'नो फ्लाइंग झोनमध्ये घुसखोरी केल्यास...', भारताने ड्रॅगनला भरला दम !

India Vs China: भारत आणि चीनमध्ये अलीकडेच विशेष लष्करी स्तरावरील चर्चा पार पडली. दरम्यान, ड्रॅगनने नुकत्याच केलेल्या हवाई हद्दीच्या उल्लंघनावरुन भारताने चर्चेदरम्यान आक्षेप नोंदवला. मेजर जनरलच्या नेतृत्वाखालील भारतीय लष्करी शिष्टमंडळाने मंगळवारी पूर्व लडाखमधील चुशुल-मोल्डो सीमेवर पीपल्स लिबरेशन आर्मीच्या समकक्षांशी बैठक चर्चा केली. यादरम्यान ड्रॅगनला LAC जवळ घिरट्या घालणाऱ्या चिनी लढाऊ विमानांवर नियंत्रण ठेवण्याचा सल्ला देण्यात आला आहे.

विशेषत: जूनपासून या प्रदेशात चीनच्या वाढलेल्या हवाई कारवायाबाबत चर्चा करण्यासाठी भारतीय शिष्टमंडळात IAF च्या ऑपरेशनल विंगमधील एअर कमोडोरचा समावेश करण्यात आला होता. चिनी विमाने अनेकदा LAC च्या बाजूने 10 किमीच्या नो-फ्लाय झोनमध्ये प्रवेश करतात. भारत (India) आणि चीन (China) यांच्यात शेवटची लेफ्टनंट-जनरल-रँक कॉर्प्स कमांडर-रँक चर्चा 17 जुलै रोजी झाली. मात्र चर्चेनंतर गस्तीवरील लष्करी अडथळे संपवण्याबाबत कोणतीही ठोस पावले चीनकडून उचलली गेली नाही.

दुसरीकडे, या आठवड्याच्या सुरुवातीला अमेरिकेच्या स्पीकर नॅन्सी पेलोसी यांच्या भेटीनंतर चीनने तैवान सामुद्रधुनीत आक्रमक भूमिका घेतली आहे. चिनी सैनिकांनी तैवानवर (Taiwan) बॅलेस्टिक क्षेपणास्त्रे डागली.