नवी दिल्ली: भाजपचे राष्ट्रीय अध्यक्ष नितीन नवीन यांच्या राजीनाम्यानंतर रिक्त झालेल्या बिहारच्या बांकीपूर विधानसभा मतदारसंघामध्ये भाजपवर पराभवाची नामुष्की ओढवली आहे. जनसुराज पक्षाचे प्रमुख प्रशांत किशोर यांनी चमकदार विजय मिळवीत पहिल्यांदाच विधानसभेत प्रवेश केला असून, भाजपच्या केंद्र आणि राज्यातील सत्तेविरोधात जनतेमध्ये निर्माण झालेल्या असंतोषाचे प्रतिबिंब या निकालात दिसल्याची प्रतिक्रिया विरोधकांमधून व्यक्त करण्यात येत आहे.

दरम्यान, मध्य प्रदेशातील दातिया आणि गुजरातमधील मांजलपूरच्या जागा काँग्रेस आणि भाजपने राखल्या आहेत. या तिन्ही मतदारसंघामध्ये ३० जुलै रोजी मतदान झाले होते. यातील बांकीपूर आणि पाठोपाठ दातियाची निवडणूक विशेष चर्चेत आली होती.

नितीन नवीन यांच्या राजीनाम्यानंतर बांकीपूरची निवडणूक होत असतानाच, प्रशांत किशोरही रिंगणात उतरले. या मतदारसंघात १९९५पासून भाजपचा उमेदवार विजयी होत आला आहे आणि नितीन नवीनही पाच वेळा विजयी झाले होते. भाजपने ऐनवेळी उमेदवार बदलत नीरजकुमार सिन्हा यांना संधी दिली.

मात्र, प्रचारात सुरुवातीपासूनच जनसुराज पक्षाने आघाडी घेतली होती. ‘बांकीपूरमध्ये भाजपच्या तिकीटावर कुत्री-मांजरेही जिंकतील, असा भाजप नेते दावा करीत आहेत,’ असा प्रचार प्रशांत किशोर यांच्या विजयात हातभार लावणारा ठरला. किशोर यांच्या या आरोपाचे भाजपकडून खंडन केले गेले नाही.

भाजप आणि काँग्रेसमधील अंतर्गत कलहामुळे दातियाच्या निवडणुकीकडेही लक्ष लागले होते. या मतदारसंघात विजयी झालेले काँग्रेसचे राजेंद्र भारती बँक गैरव्यवहारात तीन वर्षांची शिक्षा झाल्यामुळे अपात्र ठरल्यामुळे पोटनिवडणूक घ्यावी लागली.

काँग्रेसचे कुंवर घनश्याम सिंह यांनी भाजपचे आशुतोष तिवारी यांचा ६०१६ मतांनी पराभव केला. मध्य प्रदेशचे माजी गृहमंत्री नरोत्तम मिश्रा यांना उमेदवारी नाकारल्यामुळे भाजपमध्ये, तर काँग्रेसने उमेदवारी नाकारल्यामुळे राजेंद्र भारती यांच्यामुळे दोन्ही पक्षांमध्ये बंडाळी माजली होती.

बांकीपूर (बिहार)

६४,१५१

प्रशांत किशोर, जनसुराज पक्ष

४४,८२७

नीरजकुमार, भाजप

१४,२७३

रेखाकुमारी, राजद