Delhi Chief Minister Arvind Kejriwal: दिल्लीचे मुख्यमंत्री अरविंद केजरीवाल सिंगापूरला जाऊ शकणार नाहीत. लेफ्टनंट गव्हर्नर व्हीके सक्सेना यांनी या दौऱ्याला परवानगी नाकारली आहे. अरविंद केजरीवाल यांना 1 ऑगस्ट रोजी एका परिषदेत सहभागी होण्यासाठी सिंगापूरला जायचे होते. दिल्ली सरकारने यासाठी एलजीकडे परवानगी मागितली होती. मात्र, ही महापौरांची बैठक असल्याचे एलजी कार्यालयाकडून सांगण्यात आले आहे.

दरम्यान, दिल्लीचे मुख्यमंत्री अरविंद केजरीवाल (Arvind Kejriwal) यांनी नुकतेच पंतप्रधान नरेंद्र मोदी यांना पत्र लिहिले होते. त्याचवेळी आम आदमी पक्षही (Aam Aadmi Party) प्रवासाला परवानगी देण्याची मागणी सातत्याने करत होता.

थेट परराष्ट्र मंत्रालयाकडे अर्ज करणार: सिसोदिया

एलजीने फाईल नाकारल्याबद्दल उपमुख्यमंत्री मनीष सिसोदिया म्हणाले की, 'एलजीने दिलेल्या कारणाशी आम्ही सहमत नाही. मुख्यमंत्र्यांना हे वैयक्तिक निमंत्रण आहे.' सिंगापूरला (Singapore) जाण्यासाठी मुख्यमंत्री अरविंद केजरीवाल थेट परराष्ट्र मंत्रालयाकडे अर्ज करणार असल्याचे त्यांनी सांगितले. ही चुकीच्या परंपरेची नांदी असल्याचेही सिसोदिया म्हणाले.