Jammu And Kashmir: भारतीय जवानांनी जम्मू-काश्मीरमधील पूंछ जिल्ह्यात नियंत्रण रेषेजवळ (LOC) दहशतवाद्यांचा घुसखोरीचा प्रयत्न यशस्वीपणे हाणून पाडला आहे. अशी माहिती संबंधित अधिकाऱ्यांनी दिली आहे. लेफ्टनंट कर्नल देवेंद्र आनंद यांनी बुधवारी पहाटे सांगितले की, 12-13 जुलैच्या मध्यरात्री पूंछ सेक्टरमध्ये नियंत्रण रेषेजवळ घुसखोरीचा प्रयत्न करण्यात आला.

दरम्यान, सीमेवर आमच्या जवानांनी सतर्क राहून घुसखोरीचा प्रयत्न हाणून पाडला, असेही ते म्हणाले. याबाबत क्षणोक्षणी माहिती घेतली जात असल्याचे देवेंद्र आनंद यांनी सांगितले. पुंछ जिल्ह्यात सुरु असलेली अमरनाथ यात्रा आणि या महिन्यात सुरु होणारी आगामी बुद्ध अमरनाथ यात्रा पाहता लष्कर आणि सुरक्षा दल हाय अलर्टवर आहेत.

दुसरीकडे, लाल बाजार येथील जीडी गोएंका शाळेबाहेर दहशतवाद्यांनी नाका पार्टीवर गोळीबार केला. मात्र हल्लेखोर पळून जाण्यात यशस्वी झाल्याचे अधिकाऱ्याने सांगितले. तसेच, दहशतवादी (Terrorist) हल्ल्याची माहिती मिळताच लष्कर आणि पोलिसांच्या (Police) पथकाने परिसराची नाकेबंदी केली आहे. दहशतवाद्यांचा शोध सुरु आहे.