Saurabh Bhardwaj And Atishi Singh: दिल्ली सरकारच्या 2 नवीन मंत्र्यांनी आज शपथ घेतली. सौरभ भारद्वाज आणि आतिशी सिंह यांनी मंत्रीपदाची शपथ घेतली आहे. सौरभ भारद्वाज यांना दुसऱ्यांदा मंत्रिमंडळात स्थान मिळाले आहे, तर आतिशी सिंह पहिल्यांदाच मंत्रिमंडळात सामील झाल्या आहेत.

सौरभ यांची प्रोफाइल?

सौरभ भारद्वाज केजरीवाल-1 मंत्रिमंडळात परिवहन मंत्री होते आणि सध्या ते दिल्ली जल बोर्डाचे उपाध्यक्ष आहेत. दिल्लीतील (Delhi) ग्रेटर कैलासमधून ते तिसऱ्यांदा आमदार झाले आहेत. त्यांनी संगणक शास्त्रात अभियांत्रिकी पदवी घेतली आहे.

यानंतर त्यांनी सॉफ्टवेअर इंजिनीअर म्हणूनही काम केले. सौरभ यांनी उस्मानिया विद्यापीठातून एलएलबीचेही शिक्षण घेतले आहे. सत्येंद्र जैन तुरुंगात गेल्यानंतर हे पद रिक्त असल्याने त्यांना आरोग्य खाते दिले जाऊ शकते, अशी चर्चा यापूर्वीच होती.

सत्येंद्र जैन यांना मे 2022 मध्ये अटक करण्यात आली होती. ईडीने त्याला मनी लाँड्रिंग प्रकरणात अटक केली होती.

कोण आहे आतिशी सिंह?

आतिशी सिंह कालकाजी मतदारसंघातून आम आदमी पक्षाच्या (Aam Aadmi Party) आमदार आहेत. त्या शिक्षण मंत्रालयात सिसोदिया यांच्या माजी सल्लागार होत्या.

दिल्लीतील शाळांमध्ये बदल घडवून आणण्यात त्यांनी महत्त्वाची भूमिका बजावली आहे. त्यांनीच दिल्लीत हॅपीनेस स्कूल सुरु केले.

आतिशीने सेंट स्टीफन कॉलेजमधून बॅचलरची पदवी घेतली आहे. त्यांनी ऑक्सफर्ड विद्यापीठातून पदव्युत्तर पदवी घेतली आहे. त्यांना प्रथमच दिल्ली मंत्रिमंडळात स्थान मिळाले.