मंगेशी: स्वरसम्राज्ञी लता मंगेशकर यांच्या निधनाने त्यांच्या मंगेशी (ता. फोंडा) या गावी आज शोकाकुल वातावरण होते. मंगेशकर कुटुंबाशी संबंधित असलेल्या अनेकांनी त्यांच्या आठवणींना उजाळा देत लतादीदींना आदरांजली अर्पण केली. (Lata Mangeshkar)

लतादीदींचे (Lata Mangeshkar) वडील मास्टर दीनानाथ मंगेशकर यांचा जन्म मंगेशी येथे झाला होता. आजही त्यांचे जुने घर येथे आहे. पणजीपासून 21 किलोमीटर अंतरावर असलेल्या मंगेशी येथे आज प्रस्तुत प्रतिनिधीने भेट देऊन तेथील लोकांच्या भावना जाणून घेतल्या.

मंगेशकर कुटुंबाच्या गावाच्या नात्याविषयी माहिती देताना येथील प्रसिद्ध मंगेश मंदिराचे पुजारी शैलेश अभिषेकी म्हणाले, मंगेशाच्या मंदिरावरूनच गावाला मंगेशी नाव पडले. या देवाचे काही सेवेकरी मंडळी आहेत. लतादीदींचे वडील दीनानाथ यांचे आधीचे आडनाव वेगळे होते. मंदिराचे ते देखील सेवेकरी असल्याने येथून जाताना त्यांनी मंगेशकर हे आडनाव लावले.

लतादीदी येथे 12 वर्षांपूर्वी शिवरात्रीला मंदिरात (Temple) दर्शनासाठी आल्या होत्या. ही त्यांची अखेरची भेट. त्यांच्या भगिनी आशाताई, बंधू हृदयनाथ दर्शनास येथे नेहमी येतात. मंगेशकर कुटुंबाच्या गावाचा फारसा नाही; पण मंदिराशी कायम ऋणानुबंध राहिला. मंगेशावर त्यांनी गायलेले ‘मागे उभा मंगेश, पुढे उभा मंगेश’ हे गीतही अजरामर आहे. लतादीदींमुळे गावाचे नाव साऱ्या देशभर पोहोचले याचा आम्हाला अभिमानच वाटतो.

संगीताचा रियाज

दोनशे घरांच्या मंगेशी (Mangeshi) गावामध्ये सध्या मंगेशकर नावाची साधारण चार घरे आहेत. लतादीदींच्या शेजारी राहणारे अरविंद मंगेशकर म्हणाले, लतादीदींच्या वडिलांचा जन्मच आमच्या घरात झाला होता. येथेच ते अभिषेकी कुटुंबीयांसमवेत रियाज करीत. त्यांचे येथे नेहमी येणे-जाणे होते.

- धनंजय बिजले