गोव्यातील प्रतिभावान दिग्दर्शक आणि प्रशिक्षित तंत्रज्ञांकडून अनेक चांगल्या सिनेमा निर्मिती होताना दिसत आहेत. काही विलक्षण दिग्दर्शकांबरोबर काम करण्याचे भाग्यही मला लाभले आहे.

मी मुंबईत वाढले पण अभिनयाची संधी मला गोव्यातच प्राप्त झाली- नाटक, लघुपट, सिनेमा जाहिराती अशा अनेक माध्यमातून!

एक कलाकार म्हणून जेव्हा मी पाहते की गोवा आणि मुंबईच्या कलाकारांना वेगवेगळी वागणूक दिली जाते तेव्हा मला फार खंत वाटते. मानधनाच्या बाबतीतही गोव्यातील कलाकारांना फारच कमी मोबदला दिला जातो.

व्यावसायिक निर्मितीसाठी काम करताना मी चांगल्या मोबदल्याची अपेक्षा अवश्य करते पण कोणी आपल्या उत्कट आवडीने किंवा सामाजिक बांधिलकीच्या दृष्टिकोनातून सिनेमा बनवत असेल तेव्हा मी त्यांच्यासाठी विनाशुल्क काम केले आहे. कारण तिथे समर्पण आणि काहीतरी चांगले बनवण्याचा निग्रह मी पाहू शकते.

मला प्रकर्षाने वाटते की गोव्यात अनेक चांगले नवोदित कलाकार आहेत. व्यावसायिक कास्टिंग एजन्सीने अशा कलाकारांना पाठबळ दिले पाहिजे तसेच त्यांना चांगला मेहनताना मिळेल याकडे लक्ष द्यायला हवे.

जर गोव्यातील एखादा अभिनेता संपूर्णपणे या उद्योगावर अवलंबून राहायला पाहत असेल तर ते कठीण असेल. आपल्या अस्तित्वाच्या शाश्वततेसाठी त्याने अभिनयाबरोबर इतर विभागांतही काम करणे आवश्यक आहे. मी अनेक चांगल्या कलाकारांना तसे करताना पाहिले आहे.

लिंगाच्या आधारावर कलाकारांमध्ये फरक असावा असे मला वाटत नाही. गोव्यात कलाकारांना चांगला आदर मिळतो. इच्छुक कलाकारांनी शिकत राहणे, गोव्याबाहेरच्या कार्यशाळांना देखील उपस्थित राहणे गरजेचे आहे.

कामासाठी त्यांनी नेहमीच तत्पर असले पाहिजे. सिनेमा हा सहज घेण्यासारखा उद्योग नाही. चांगला किंवा यशस्वी अभिनेता बनण्यासाठी विशिष्ट फॉर्म्युला नाही. त्यात प्रयोग करत राहणे हेच महत्त्वाचे आहे.

रती भाटीकर, अभिनेत्री