भारतीय क्रिकेट संघासमोर सध्या मैदानावरील प्रतिस्पर्ध्यांपेक्षा खेळाडूंच्या फिटनेसचं आव्हान अधिक गंभीर होताना दिसत आहे. टीम इंडियाच्या सध्याच्या संघरचनेत तसेच भविष्यातील योजनांमध्ये महत्त्वाची भूमिका असलेल्या तब्बल 13 क्रिकेटपटूंना दुखापतींमुळे बंगळुरू येथील सेंटर ऑफ एक्सलन्समध्ये (CoE) रिहॅबिलिटेशन करावं लागत आहे. भारतीय क्रिकेट नियामक मंडळाच्या (BCCI) वैद्यकीय पथकाकडून या सर्व खेळाडूंच्या प्रकृतीवर बारकाईने लक्ष ठेवण्यात येत असून, प्रत्येकाच्या दुखापतीनुसार स्वतंत्र पुनर्वसन कार्यक्रम आखण्यात आला आहे.
भारतीय संघाच्या आगामी मालिकांच्या पार्श्वभूमीवर ही दुखापतींची मालिका संघ व्यवस्थापनासाठी मोठी डोकेदुखी ठरली आहे. काही अनुभवी खेळाडू तर काही भविष्यातील महत्त्वाचे पर्याय सध्या मैदानापासून दूर आहेत. त्यामुळे उपलब्ध खेळाडूंवर अतिरिक्त भार येण्याची शक्यता निर्माण झाली आहे.
जसप्रीत बुमराह, हार्दिक पांड्या, नितीश कुमार रेड्डी, साई सुदर्शन, हर्षित राणा, वरुण चक्रवर्ती आणि वॉशिंग्टन सुंदर यांच्यासारख्या नावांसोबत आकाशदीप, हिमांशू सिंह, अशोक शर्मा, सुयश शर्मा, युद्धवीर सिंह आणि रियान पराग यांचाही समावेश या दुखापतग्रस्त यादीत आहे.
भारताचा प्रमुख वेगवान गोलंदाज जसप्रीत बुमराहच्या दुखापतीने सर्वाधिक लक्ष वेधलं आहे. इंग्लंडविरुद्धच्या वनडे सामन्यातून बाहेर पडल्यानंतर तो 30 जुलै रोजी सेंटर ऑफ एक्सलन्समध्ये दाखल झाला. त्याच्या डाव्या गुडघ्याच्या सांध्याशी संबंधित समस्या निर्माण झाली असून, त्यामुळे श्रीलंकेविरुद्धच्या कसोटी मालिकेत त्याची अनुपस्थिती निश्चित झाली आहे.
सध्या बुमराहचा भर ताकद आणि फिटनेस वाढवण्यावर आहे. त्याच्या पुनरागमनाची निश्चित तारीख अद्याप समोर आलेली नाही. भारतासाठी बुमराह हा केवळ प्रमुख गोलंदाज नसून संघाच्या वेगवान गोलंदाजीचा आधारस्तंभ असल्याने त्याच्या फिटनेसकडे विशेष लक्ष दिलं जात आहे.
हार्दिक पंड्याला डाव्या मांडीच्या क्वाड्रिसेप्स भागात दुखापत झाली होती. त्यानंतर त्याने कौशल्यावर आधारित सरावामध्ये चांगली प्रगती केली होती. गोलंदाजी करताना तो जवळपास 80 ते 90 टक्के क्षमतेने आठवड्यात 12 ते 15 षटकं टाकत होता.
मात्र याच काळात त्याच्या उजव्या शिनमध्ये वेदना जाणवू लागल्या. तपासणीत गंभीर समस्या आढळली नसली तरी खबरदारीचा उपाय म्हणून त्याची धावण्याची प्रक्रिया काही काळ थांबवण्यात आली. आता त्याने पुन्हा रनिंग सुरू केलं असून, पुढील टप्प्यात त्याचा वर्कलोड हळूहळू वाढवला जाणार आहे.
नितीश कुमार रेड्डी डाव्या मांडीच्या दुखापतीतून अपेक्षेप्रमाणे सावरत आहे. त्याने रिहॅबचा महत्त्वाचा टप्पा पार करत पुन्हा क्रिकेटशी संबंधित कौशल्यांच्या सरावाला सुरुवात केली आहे. मागील आठवड्यात त्याने 16 षटकं गोलंदाजी केली असून, वेगाने धावण्याच्या सरावावरही त्याचा भर आहे.
साई सुदर्शननेही फलंदाजी आणि क्षेत्ररक्षणाच्या सरावाला सुरुवात केली आहे. त्याने नेट्समध्ये दीर्घकाळ फलंदाजी करण्यासोबत रनिंग सेशनही केलं. मात्र दुखापत झालेल्या पायाच्या अंगठ्यात अजूनही वेदना आहेत. पुढील दोन दिवसांच्या सरावानंतर त्याच्या स्थितीचा MRI स्कॅनच्या माध्यमातून आढावा घेतला जाणार आहे.
वेगवान गोलंदाज हर्षित राणा उजव्या हॅमस्ट्रिंगच्या दुखापतीतून पुनरागमन करण्याचा प्रयत्न करत आहे. 20 जुलैपासून तो CoE मध्ये रिहॅब घेत आहे. शरीराचं वजन नियंत्रित ठेवण्यापासून विविध रिकव्हरी पद्धतींपर्यंत त्याच्यावर काम केलं जात आहे. आता त्याच्या कौशल्याधारित सरावालाही सुरुवात करण्यात येत आहे.
वॉशिंग्टन सुंदरलाही उजव्या हॅमस्ट्रिंगची दुखापत झाली आहे. त्याने जॉगिंग सुरू केली असून सध्या कंडीशनिंग आणि स्ट्रेंथ ट्रेनिंगवर भर आहे. त्याची ताकद आणि शरीराचा समतोल सुधारत असल्याचं दिसत आहे. पुढील काही आठवड्यांत त्याचा व्यायाम आणि क्रिकेट वर्कलोड वाढवला जाणार आहे.
वरुण चक्रवर्तीच्या डाव्या हॅमस्ट्रिंगला दुखापत झाली आहे. त्याच्या रिहॅबचा पुढील टप्पा अधिक आव्हानात्मक असणार आहे. वेगाने धावणे, अचानक दिशा बदलणे आणि ताकदीचे व्यायाम यांचा समावेश त्याच्या पुढील कार्यक्रमात असेल.
सध्या तो स्पॉट बॉलिंगमध्ये सहा षटकांपर्यंत गोलंदाजी करत आहे. पुढील सराव सत्रात फलंदाजांसमोर आठ षटकं टाकण्याच्या दिशेने त्याचा वर्कलोड वाढवला जाणार आहे.
आकाशदीप पाठीच्या खालच्या भागातील स्ट्रेस फ्रॅक्चरमुळे मैदानाबाहेर आहे. मात्र त्याच्या रिहॅबमध्ये समाधानकारक प्रगती झाली आहे. सुरुवातीच्या उपचारांनंतर तो आता प्रत्यक्ष क्रिकेट वर्कलोडच्या दिशेने पुढे जात आहे. त्याच्या शरीराला क्रिकेटच्या वाढत्या ताणासाठी तयार करण्यावर सध्या लक्ष केंद्रित करण्यात आलं आहे.
मुंबईचा वेगवान गोलंदाज हिमांशू सिंह उजव्या गुडघ्याच्या दुखापतीमुळे CoE मध्ये आहे. 28 जुलैपासून त्याने स्पॉट बॉलिंगला सुरुवात केली असून त्यावेळी कोणतीही मोठी अडचण जाणवली नाही. आगामी काळात त्याच्या गोलंदाजीसोबतच एकूण प्रशिक्षणाचा भार टप्प्याटप्प्याने वाढवला जाणार आहे.
या 13 खेळाडूंमध्ये अशोक शर्माची दुखापत विशेष चिंतेची मानली जात आहे. झिम्बाब्वेविरुद्धच्या तिसऱ्या टी-20 सामन्यानंतर त्याला पाठीच्या खालच्या भागात तीव्र वेदना जाणवल्या. त्यानंतर करण्यात आलेल्या तपासण्यांमध्ये पाठीच्या L1 भागात तीव्र स्ट्रेस फ्रॅक्चर असल्याचं समोर आलं. याशिवाय डाव्या बाजूच्या 11व्या बरगडीलाही फ्रॅक्चर झाल्याचं निदान झालं आहे.
त्याच्या MRI आणि CT स्कॅनशी संबंधित अहवालांचा पुढील वैद्यकीय सल्ल्यासाठी परदेशातील स्पाइन तज्ज्ञांकडून आढावा घेण्यात आला. त्यामुळे त्याच्या पुनरागमनासाठी अधिक काळ लागू शकतो.
सुयश शर्मा मागील IPLनंतर गोलंदाजी करू शकलेला नाही. दोन्ही गुडघ्यांमध्ये टेंडिनोपॅथीची समस्या आढळल्यानंतर त्याच्यावर उपचार करण्यात आले. सुरुवातीच्या उपचारांचा अपेक्षित फायदा न झाल्याने त्याला PRP उपचार देण्यात आले. आता तो संरचित रिहॅब कार्यक्रमातून जात असून गुडघ्यांची ताकद वाढवण्यावर भर दिला जात आहे.
युद्धवीर सिंहच्या उजव्या खांद्याची समस्या आता कमी झाली आहे. तो पूर्ण शरीराच्या स्ट्रेंथ ट्रेनिंगसोबत खांद्याच्या पुनर्वसनासाठी आवश्यक व्यायाम करत आहे. मात्र त्यालाही पूर्णपणे मैदानात परतण्यासाठी आणखी वेळ लागण्याची शक्यता आहे.
रियान परागच्या उजव्या खांद्यावर शस्त्रक्रिया झाल्यानंतर तो सध्या रिकव्हरीच्या टप्प्यात आहे. त्याने स्ट्रेंथ आणि कंडीशनिंगचा नियोजित कार्यक्रम सुरू केला आहे. मात्र फलंदाजी किंवा गोलंदाजीच्या सरावाला नेमकी कधी सुरुवात होईल, याबाबत अद्याप निश्चित वेळापत्रक देण्यात आलेलं नाही.
एकाच वेळी 13 खेळाडू दुखापतीमुळे रिहॅबमध्ये असल्याने भारतीय क्रिकेटच्या वैद्यकीय आणि सपोर्ट स्टाफवर मोठी जबाबदारी आली आहे. प्रत्येक खेळाडूची दुखापत वेगळी असल्यामुळे सर्वांसाठी एकच उपचारपद्धती वापरण्याऐवजी वैयक्तिक फिटनेस आणि रिहॅब प्लॅनवर काम केलं जात आहे.
आगामी मालिकांसाठी संघ निवडताना खेळाडूंची पूर्ण फिटनेस चाचणी, सरावातील वर्कलोड आणि दुखापतीनंतरची क्षमता हे महत्त्वाचे निकष ठरणार आहेत. त्यामुळे सध्या टीम इंडियासाठी प्रतिस्पर्धी संघांपेक्षा आपल्या खेळाडूंना पूर्णपणे फिट ठेवणं हेच सर्वात मोठं आव्हान बनलं आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.