भारतीय क्रिकेटचा इतिहास लिहिताना विराट कोहलीचे नाव सुवर्णाक्षरांनी लिहिले जाईल. आपल्या आक्रमक फलंदाजीने, सातत्यपूर्ण कामगिरीने आणि जिंकण्याच्या जिद्दीने कोहलीने क्रिकेटविश्वात वेगळी ओळख निर्माण केली आहे. आज 5 नोव्हेंबर रोजी 'रन मशीन' विराट कोहलीचा वाढदिवस साजरा केला जात आहे. आंतरराष्ट्रीय क्रिकेटमध्ये पदार्पण केल्यापासून त्याने अनेक विक्रम आपल्या नावावर केले आहेत. त्यापैकी काही विक्रम असे आहेत, ज्यांची बरोबरी करणेही नव्या पिढीतील फलंदाजांसाठी मोठे आव्हान ठरू शकते.
विराट कोहलीला केवळ त्याच्या धावांसाठी ओळखले जात नाही, तर कठीण परिस्थितीत संघाला विजय मिळवून देण्याच्या क्षमतेसाठीही त्याचे कौतुक केले जाते. वनडे क्रिकेटमधील शतकांचा विक्रम असो किंवा आयपीएलमधील एका हंगामातील धावांचा डोंगर, कोहलीने प्रत्येक क्षेत्रात आपली छाप पाडली आहे. त्याच्या वाढदिवसानिमित्त जाणून घेऊया, असे 10 विक्रम जे मोडणे कठीण मानले जाते.
विराट कोहलीच्या नावावर वनडे क्रिकेटमध्ये सर्वाधिक शतके करण्याचा विक्रम आहे. त्याने या फॉरमॅटमध्ये 55 शतके झळकावली आहेत. महान फलंदाज सचिन तेंडुलकरने वनडे क्रिकेटमध्ये 49 शतके केली होती. कोहलीने हा विक्रम मागे टाकत नवा इतिहास घडवला. वनडे सामन्यांची संख्या आणि फलंदाजीतील सातत्य लक्षात घेता हा विक्रम मोडण्यासाठी नव्या फलंदाजांना मोठी मेहनत घ्यावी लागणार आहे.
आयपीएलमध्ये विराट कोहलीची फलंदाजी नेहमीच चर्चेचा विषय ठरली आहे. एका हंगामात सर्वाधिक धावा करण्याचा विक्रम त्याच्या नावावर आहे. 2016 च्या आयपीएल हंगामात कोहलीने 16 सामन्यांमध्ये 973 धावा केल्या होत्या. या कामगिरीत त्याने चार शतकेही झळकावली होती. अनेक हंगाम उलटून गेले, तरी त्याच्या या विक्रमाच्या जवळ पोहोचणे इतर फलंदाजांसाठी कठीण ठरले आहे.
विराट कोहलीच्या नावावर टी-20 आंतरराष्ट्रीय क्रिकेटमधील एक अनोखा विक्रम आहे. 2011 मध्ये इंग्लंडविरुद्धच्या सामन्यात त्याने गोलंदाजी करताना टाकलेला पहिला चेंडू वाइड होता. या चेंडूवर केविन पीटरसन पुढे येऊन फटका मारण्याच्या प्रयत्नात यष्टिचित झाला. त्यामुळे कोहलीच्या नावावर कायदेशीर चेंडू न टाकताच विकेट मिळवण्याची अनोखी नोंद झाली.
विराट कोहली हा आयपीएलच्या पहिल्या हंगामापासून रॉयल चॅलेंजर्स बंगळुरू संघाचा भाग आहे. अनेक वर्षांच्या कारकिर्दीत त्याने संघ बदललेला नाही. आयपीएलमध्ये अनेक दिग्गज खेळाडूंनी वेगवेगळ्या फ्रँचायझींकडून खेळले आहे. मात्र, कोहलीची आरसीबीशी असलेली नाळ कायम राहिली. एका संघाशी इतकी दीर्घकाळ जोडलेले राहणे ही त्याच्या कारकिर्दीतील खास बाब आहे.
वनडे क्रिकेटमध्ये 10 हजार धावांचा टप्पा गाठणे ही प्रत्येक फलंदाजासाठी मोठी कामगिरी असते. मात्र, विराट कोहलीने हा टप्पा गाठताना वेगाचा नवा विक्रम प्रस्थापित केला. त्याने अवघ्या 205 डावांमध्ये 10 हजार धावा पूर्ण केल्या. सचिन तेंडुलकरला हा टप्पा गाठण्यासाठी 259 डाव खेळावे लागले होते. कोहलीने 54 डाव आधीच हा विक्रम आपल्या नावावर केला.
कसोटी क्रिकेटमध्ये विराट कोहलीची फलंदाजी विशेष प्रभावी राहिली आहे. कर्णधार म्हणून खेळताना त्याने सात द्विशतके झळकावली. कसोटी क्रिकेटमध्ये कर्णधार म्हणून सर्वाधिक द्विशतके करण्याचा हा विक्रम आहे. वेस्ट इंडिजचा महान फलंदाज ब्रायन लारा याने कर्णधार म्हणून पाच द्विशतके केली होती. कोहलीने त्याला मागे टाकत नवा इतिहास घडवला.
विराट कोहलीची श्रीलंकेविरुद्धची फलंदाजी नेहमीच प्रभावी ठरली आहे. या संघाविरुद्ध वनडे क्रिकेटमध्ये त्याने 10 शतके झळकावली आहेत. एका विशिष्ट प्रतिस्पर्धी संघाविरुद्ध इतकी शतके करण्याची त्याची कामगिरी उल्लेखनीय आहे. प्रतिस्पर्ध्यांच्या गोलंदाजीवर वर्चस्व गाजवण्याची त्याची क्षमता या विक्रमातून स्पष्ट होते.
विराट कोहलीने आंतरराष्ट्रीय क्रिकेटमध्ये सातत्यपूर्ण कामगिरीच्या जोरावर अनेक पुरस्कार पटकावले आहेत. त्याच्या नावावर 22 प्लेअर ऑफ द सीरिज पुरस्कारांची नोंद आहे. संपूर्ण मालिकेत सातत्याने धावा करून संघाला विजय मिळवून देण्याची त्याची क्षमता या पुरस्कारांमधून दिसून येते. त्यामुळे हा विक्रम त्याच्या कारकिर्दीतील महत्त्वाचा टप्पा मानला जातो.
विराट कोहलीला 'चेस मास्टर' म्हटले जाते, ते उगाच नाही. मोठ्या लक्ष्याचा पाठलाग करताना त्याने अनेकदा भारताला विजय मिळवून दिला आहे. 300 पेक्षा अधिक धावांच्या लक्ष्याचा पाठलाग करताना त्याने नऊ शतके झळकावली आहेत. दबावाच्या परिस्थितीत शांतपणे फलंदाजी करत सामना जिंकून देण्याची त्याची क्षमता या विक्रमातून दिसून येते.
आंतरराष्ट्रीय क्रिकेटमध्ये 28 हजार धावांचा टप्पा गाठताना विराट कोहलीने आणखी एक मोठा विक्रम आपल्या नावावर केला. त्याने 624 डावांमध्ये हा टप्पा पूर्ण केला. सचिन तेंडुलकरने 28 हजार धावा करण्यासाठी 644 डाव घेतले होते. कोहलीने त्याच्यापेक्षा 20 डाव कमी खेळून हा टप्पा गाठला. फलंदाजीतील त्याचे सातत्य आणि धावांची भूक या विक्रमातून स्पष्ट होते.
विराट कोहलीच्या कारकिर्दीतील हे विक्रम त्याच्या अफाट प्रतिभेची साक्ष देतात. मैदानावरची जिद्द, धावांचा पाठलाग करण्याची क्षमता आणि मोठ्या सामन्यांमध्ये कामगिरी करण्याची वृत्ती यामुळे तो भारतीय क्रिकेटचा महत्त्वाचा आधारस्तंभ ठरला आहे. वाढदिवसानिमित्त त्याच्या चाहत्यांकडून शुभेच्छांचा वर्षाव होत असून, भविष्यातही त्याच्याकडून अनेक ऐतिहासिक कामगिरींची अपेक्षा आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.