Lok Sabha Election 2024: मतदान करतानाचा फोटो काढताना फातोर्डा येथे महिलेला पकडले; चौकशीअंती सुटका

Lok Sabha Election 2024: फातोर्डा येथील एका मतदानकेंद्रावर एक महिलेला मतदान करतानाचा फोटो मोबाईलवर काढत असताना आढळली. लगेच तिला पोलिसांच्या ताब्यात देण्यात आले. पोलिसांनी चौकशी करून तिची सुटका केली.

यासंदर्भात बोलताना फातोर्ड्याचे आमदार विजय सरदेसाई यांनी सांगितले की, धमकी देऊन मतदान करून घेण्याची ही भाजपची पद्धतच आहे. ज्या महिलेला पकडले तिचे नाव हजरत बी असे असून आठ वर्षांपूर्वी तिला गोवा वैद्यकीय महाविद्यालयात नोकरी मिळाली होती. तेथून बदलीसाठी तिचा प्रयत्न सुरू होता.

एका भाजप नेत्याने तिला बदली करण्याचे आश्‍‍वासनही दिले होते. पण त्या बदल्यात तिने भाजपला मत दिल्‍याचा फोटो आणून द्यायला सांगितले होते. मात्र काही नेत्यांनी पोलिसांवर (Police) दडपण आणून तिची सुटका करून घेतली. हे कृत्य तिला कुणी करायला लावले, याची चौकशी करणे गरजेचे आहे, अन्‍यथा निवडणूक आयोगाच्या मुख्य निर्वाचन अधिकाऱ्यांकडे तक्रार केली जाईल, असा इशाराही सरदेसाई यांनी दिला.

सदर घटना सासष्टीतील आठही मतदारसंघांत आज लोकसभा निवडणुकीसाठी शांततेत मतदान पार पडले. कोणताही अनुचित प्रकार घडलेला नाही. मात्र या निवडणुकीत काँग्रेस (Congress) पक्षाची संघटनात्मक उणीव दिसून आली. मुख्यमंत्री डॉ. प्रमोद सावंत यांनी मडगावचे आमदार दिगंबर कामत यांच्यासह मोतीडोंगर येथील मतदानकेंद्राला भेट दिली.

त्यानंतर लगेच फातोर्ड्याचे आमदार विजय सरदेसाई तेथे पोहोचले. तालुक्यात सकाळच्या सत्रात मतदारांचा ओघ कमी दिसला. दुपारपर्यंत फक्त ३५ टक्केच मतदान झाले होते. मात्र तीन वाजल्यानंतर मतदानकेंद्रांवर मतदारांची गर्दी दिसून आली. मडगाव, नावेली व फातोर्ड्यात भाजपचे कार्यकर्ते मतदारांना प्रोत्‍साहित करत होते.

विजय सरदेसाई, आमदार (फातोर्डा)

धमकी देऊन मतदान करून घेण्याची ही भाजपची पद्धतच आहे. ज्या महिलेला पकडले तिचे नाव हजरत बी असे असून आठ वर्षांपूर्वी तिला गोवा वैद्यकीय महाविद्यालयात नोकरी मिळाली होती. तेथून बदलीसाठी तिचा प्रयत्न सुरू होता. एका भाजप नेत्याने तिला बदलीचे आश्‍‍वासनही दिले होते. पण त्या बदल्यात तिने भाजपला मत दिल्‍याचा फोटो आणून द्यायला सांगितले होते.