Goa Politics: पेडणेच्या आमदारांवरही आता कारवाई केली जाणार काय?

Goa Politics: पेडणे तालुक्यातील आमदाराने आठ हजार चौरस मीटर जागेत जो बंगला उभारला आहे. त्या बंगल्याच्या बांधकामासाठी आवश्‍यक असलेली कन्व्हर्जन सनद, नगर नियोजन प्राधिकरणाची (टीसीपी) परवानगी, पंचायतीची परवानगी असे काहीही नसताना आमदाराने बंगला उभारला आहे.

नगर नियोजनमंत्र्यांनी जशी आमदार जीत आरोलकर यांच्याबाबत कारवाईची भाषा केली आहे. तशी पेडणे आमदारांच्या बंगल्यावर नगर नियोजनमंत्री, मुख्यमंत्री कारवाई करून तो जमीनदोस्त करणार काय, असा सवाल काँग्रेस प्रवक्ते संजय बर्डे यांनी मंगळवारी (ता.१०) पत्रकार परिषदेत केला.

पेडणे तालुक्यातील विभागीय नियोजन आराखडा (झोनिंग प्लॅन) तूर्त नगर नियोजनमंत्र्यांनी स्थगित ठेवला आहे. तालुक्यातील जनतेने हा आराखडा रद्द करावा, अशी मागणी लावून धरली आहे. त्यानिमित्त काँग्रेस भवनात झालेल्या पत्रकार परिषदेस प्रवक्ते संजय बर्डे, ॲड. जितेंद्र गावकर, प्रणव परब व इतर उपस्थित होते.

ॲड. जितेंद्र गावकर म्हणाले, पेडण्याचा विभागीय नियोजन आराखडा कोणत्याही स्थानिक स्वराज्य संस्थांना विचारात न घेता केला गेला. त्या आराखड्याला होणारा विरोध पाहून नगर नियोजनमंत्र्यांनी तो स्थगित ठेवला आहे. खरेतर आम्ही तो रद्द करण्याची मागणी केली आहे. ११ पंचायतींनी या आराखड्यास विरोध केला आहे. अजूनही मोपा विमानतळासाठी दिलेल्या जमिनीचा मोबादला अनेकांना मिळालेला नाही.

प्रणव परब म्हणाले, येथील टॅक्सीचालकांचा प्रश्‍न आहे, आयुष इस्पितळातील नोकऱ्यांचा प्रश्‍न आहे, बेरोजगारांचा नोकऱ्यांचा प्रश्‍न आहे. असे प्रश्‍न असताना विभागीय नियोजन आराखडा करून १ कोटी ४४ लाख चौ.मी. रूपांतरण कोणासाठी, केले जात आहे. भाजप सरकार लोकांविरोधी धोरण राबवीत असल्याचा आरोपही त्यांनी केला.