Goa Industries: हा मुर्खपणाचा निर्णय! गोवा सरकार पगारी रजा कशी घोषित करू शकते? गोव्यातील उद्योगांचा सवाल

Goa State Industries Assosiation: कर्नाटकच्या विधानसभा निवडणुकीच्या मतदानादिवशी गोव्यातील कर्नाटकच्या कर्मचाऱ्यांना गोवा सरकारने पगारी रजा घोषित केली आहे. तथापि, या निर्णयावरून गोव्यातील उद्योगांनी नाराजी व्यक्त केल्याचे समजते.

राज्य सरकार अशी घोषणा कशी करू शकतात, असा सवाल Goa State Industries Assosiation (GSIA) ने केला आहे. हा निर्णय मुर्खपणाचा आहे. अशा पद्धतीचा निर्णय घेण्याची काही गरज नव्हती. अशा निर्णयाचा काहीही संबंधच येत नव्हता.

राजकीय फायद्यासाठी उद्योगांना दावणीला बांधण्याचा हा प्रकार आहे. प्रत्येक निवडणुकीत हे असेच होत राहिले तर गोव्यात उद्योग करणे अवघड होऊन जाईल.

आम्ही यावर कायदेशीर उपाय काय करता येईल, हे पाहत आहोत. गोवा सरकारचा हा निर्णय एकतर्फी आहे, असे GSIA ने म्हटले आहे. यातून उद्योगांची नाराजीच व्यक्त झाली आहे.

कर्नाटक विधानसभा निवडणुकीत 10 मे रोजी मतदान होत आहे. गोव्यात असलेल्या कर्नाटकातील कर्मचाऱ्यांना जे मतदार आहेत, अशांना गोवा सरकारने 10 मे रोजी पगारी सुट्टी जाहीर केली आहे. याबाबतचा आदेश राज्य सरकारने सोमवारी जारी केला होता.

सरकारने या आदेशात म्हटले आहे की, कर्नाटकातील काही मतदार गोव्यात कामानिमित्त राहत आहेत. अशा गोव्यात असलेल्या कर्नाटकातील मतदार कर्मचाऱ्यांसाठी कर्नाटक विधानसभा निवडणुकीच्या मतदानासाठी बुधवारी 10 मे रोजी पगारी सुट्टी जाहीर करण्यात आली आहे.

औद्योगिक कामगार, सरकारी विभागातील रोजंदारी कामगार, राज्य सरकारचे औद्योगिक विभाग, गोवा राज्यातील खाजगी आस्थापनांचे व्यावसायिक आणि औद्योगिक कामगार या कर्नाटकातील मतदारांना कर्नाटक विधानसभा निवडणुकीच्या मतदानासाठी गोवा सरकारने पगारी सुट्टी जाहीर केली आहे. दरम्यान, या आदेशावर GSIA ने नाराजी व्यक्त केली आहे.