वास्को काँग्रेस गटाच्या अल्पसंख्यांक विभागाच्या अध्यक्षपदी तन्वीर सौदागर

वास्को: गोवा प्रदेश काँग्रेस समितीतर्फे वास्को काँग्रेस गटाच्या अल्पसंख्यांक विभागाच्या अध्यक्षपदी तन्वीर सौदागर यांची नियुक्ती करण्यात आली आहे. यावेळी पक्षाचे कार्य पुढे नेण्यासाठी सर्व ते प्रयत्न करणार असल्याची माहिती नवनिर्वाचित वास्को काँग्रेस (Congress) गटाच्या अल्पसंख्यांक विभागाचे अध्यक्ष तन्वीर सौदागर यांनी दिली.

गोवा प्रदेश काँग्रेस अल्पसंख्यांक विभागाचे अध्यक्ष नजीर खान यांच्या वास्को येथील कार्यालयात तन्वीर सौदागर यांना वास्को काँग्रेस गटाच्या अल्पसंख्यांक विभागाचे अध्यक्षपदी नियुक्ती केल्याचे प्रशस्तीपत्र देण्यात आले. यावेळी मुरगावचे माजी नगराध्यक्ष नंदादीप राऊत, साजिद खान, वास्को काँग्रेस गटाचे युवा अध्यक्ष शंकर तांडेल उपस्थित होते. यावेळी नजीर खान यांनी सांगितले की, 'गोव्यातील सामान्य जनतेबरोबर अल्पसंख्यांक जनता यंदा पूर्णपणे काँग्रेस पक्षाबरोबर राहणार आहे. तसेच गोव्यातील अल्पसंख्यांकाना न्याय देण्यासाठी गोवा प्रदेश काँग्रेस पुढाकार घेणार आहे.'

तन्वीर सौदागर यांनी सांगितले की, पक्षाचे अध्यक्ष गिरीश चोडणकर (Girish Chodankar) अल्पसंख्यांक विभागाचे अध्यक्ष नजीर खान यांच्या मार्गदर्शनाखाली काँग्रेस पक्ष बळकट करण्यासाठी प्रयत्न करणार आहे. वास्कोत काँग्रेसचे कार्य सर्वापर्यंत घेऊन जाणार असल्याची माहिती सौदागर यांनी दिली. यावेळी वास्को काँग्रेस युवा अध्यक्ष शंकर तांडेल यांनी पक्षाचे कार्य पुढे नेण्यासाठी काँग्रेस वरिष्ठांचे मार्गदर्शन महत्त्वाचे असणार आहे. वास्कोत पुन्हा काँग्रेस मजबूत करण्यासाठी आपली शक्ती युवा नेते नंदादीप राऊत यांच्या पाठीशी खंबीरपणे राहणार असल्याची माहिती शेवटी तांडेल यांनी दिली.