27 वर्षे आमदार असूनही दिगंबर कामत यांचे मडगाव 'अविकसीतच'!

मडगाव: दिगंबर कामत हे मागची 27 वर्षे माडगावचे आमदार असूनही त्यांच्याकडून माडगावचा सुनियोजित विकास हा कधी झालाच नाही. त्यामुळे मडगाव गोव्याची आर्थिक राजधानी असूनही विकासाच्या बाबतीत मागेच राहिली असा आरोप मडगावच्या माजी नगराध्यक्ष आणि मडगाव (Margao) काँग्रेस मंडळाच्या माजी अध्यक्ष डोरिस टेक्सेरा (Doris Texerab) यांनी केला.

सध्या तृणमुल पक्षात प्रवेश केलेले कामत (Digambar Kamat) यांचे पूर्वीचे समर्थक डोरिस टेक्सेरा आणि नगरसेवक महेश आमोणकर (Mahesh Amonkar) यांनी आज पत्रकार परिषद घेऊन कामत यांच्यावर आरोप केले. मडगावची कामत यांनी कशी वाट लावली हे मडगाव रेल्वे स्थानक परिसराला भेट दिल्यावर कळून येते. मडगाव हे गोव्यातील प्रमुख जंक्शन असतानाही त्याला ओंगळवाणे स्वरूप आले आहे ते पाहिल्यास मडगावकरांना लाजेने मान खाली घालावी लागते असे त्या म्हणाल्या. मडगाव ही गोव्याची (Goa) आर्थिक राजधानी असुनही या शहरात चांगले मर्केट नाही, चांगले उद्यान नाहीं, मैदानावर पुरेशा सोयी नाहीत, पार्किंगची व्यवस्था चांगली नाही. एव्हढेच नव्हे तर पुरेशा सौचालयांचीही सोय नसल्याने लोकांना त्रास सोसावे लागत असल्याचा आरोप केला.

शिवाय, महेश आमोणकर यांनी कामत यांनी मडगावकडे दुर्लक्ष केल्याने फातोर्ड्याचा विकास झाला असा आरोप करून कामत यांच्याकडे मुस्लिमांच्या कब्रस्थानचा प्रश्नही सुटू शकला नाही असा आरोप केला.