डिचोली: सर्वण कोमुनिदादच्या कथित जमीन घोटाळा प्रकरणी आक्रमक झालेल्या सावंत गावकऱ्यांनी अखेर आज सायंकाळी संबंधित कोमुनिदादच्या जमिनीत फलक लावला. ‘अतिक्रमण करण्यास प्रतिबंध’ असे फलकावर ठळकपणे नमूद करण्यात आले आहे.
फलक लावण्यात आल्यानंतर त्याठिकाणी जमलेल्या सावंत गावकऱ्यांनी डिचोली पोलिस स्थानकात जाऊन कोमुनिदादच्या जमिनीत एका बांधकाम कंपनीकडून बेकायदेशीरपणे अतिक्रमण झाले आहे. या प्रकरणाची दखल घ्यावी, अशी लेखी तक्रार दाखल केली. सर्वण कोमुनिदादच्या कथित जमीन घोटाळाप्रकरणी गेल्या काही दिवसांपासून सर्वण गावात वातावरण खदखदत आहे.
या कथित घोटाळ्याची भांडाफोड करण्यासाठी कोमुनिदादशी संबंधित बहुतांश युवक मिळून सावंत गावकरी पेटून उठले आहेत. गेल्या शुक्रवारी बैठकीत ठरल्याप्रमाणे (रविवारी) सायंकाळी संघटीत झालेल्या सावंत गावकऱ्यांनी बेकायदेशीरपणे विक्री झाल्याचा संशय असलेल्या कोमुनिदादच्या सर्व्हे नं. १९/२ या जागेकडे मोर्चा वळविला.
नंतर त्या ठिकाणी मालमत्ता कोमुनिदादची असल्याचा फलक लावला. यावेळी ५० हून अधिक सावंत गावकर उपस्थित होते. मोठ्या प्रमाणावर जमाव एकत्र झाल्याने पोलिसही घटनास्थळी दाखल झाले होते. मात्र, पोलिस नेमके कोणाच्या सांगण्यावरून आले, ते समजू शकले नाही.
सर्वण कोमुनिदादची जमीन बेकायदेशीरपणे परस्पर विकण्याचा प्रकार घडला असून या गैरव्यवहारातून मोठा आर्थिक घोटाळा झाला आहे, असा गावकऱ्यांना संशय आहे. हा घोटाळा उघड झाल्यानंतर सर्वण गावात खळबळ माजली असून गेल्या काही महिन्यांपासून हे घोटाळ्याचे प्रकरण गावात खदखदत आहे. या घोटाळ्याची भांडाफोड करण्यासाठी कोमुनिदादचे सदस्य असलेले सावंत गावकरी संघटीत झाले आहेत.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
