'गांधींच्या तत्त्वज्ञानावर चालणे हीच खरी श्रद्धांजली'! CM सावंतांचे प्रतिपादन; ‘गावांच्या विकासाचे’ स्वप्न सत्यात आणण्यासाठी करणार प्रयत्न

पणजी: महात्मा गांधींनी आपल्या विचारांतून जगाला सत्य, अहिंसा आणि शांततेचा मार्ग दाखविला. त्यांनी दिलेल्या या तत्त्वज्ञानावर चालणे हीच त्यांना खरी श्रद्धांजली ठरेल, असे मत मुख्यमंत्री प्रमोद सावंत यांनी व्यक्त केले.

महात्मा गांधी आणि लाल बहादूर शास्त्री यांच्या जयंतीनिमित्त जुने गोवे येथे सरकारने आयोजित केलेल्या अभिवादन कार्यक्रमात ते बोलत होते. गांधी चौकातील महात्मा गांधींच्या पुतळ्यास आणि लाल बहादूर शास्त्रींच्या प्रतिमेस पुष्पांजली अर्पण करून त्यांनी अभिवादन केले.

याप्रसंगी केंद्रीय ऊर्जा राज्यमंत्री श्रीपाद नाईक, आमदार राजेश फळदेसाई, मुख्य सचिव डॉ. व्ही. कंदवेलू, उत्तर गोवा जिल्हाधिकारी अंकित यादव, उत्‍तर गोवा जिल्हा पंचायत सदस्य सिद्धेश नाईक, धाकू मडकईकर यांच्यासह इतर मान्यवरांची उपस्थिती होती.

सावंत म्हणाले, देशाला स्वातंत्र्य मिळवून देण्यात महात्मा गांधी यांचे कार्य मोलाचे आहे. त्यांच्या विचारामुळेच पंतप्रधान नरेंद्र मोदी यांनी ‘आत्मनिर्भर भारत’ आणि राज्यात आम्ही ‘स्वयंपूर्ण गोवा’ असा नारा दिला आहे.

‘गांधीजींचे स्वप्न सत्यात आणण्याचे प्रयत्न’

केंद्रातील आणि राज्यातील योजना स्वयंपूर्णमित्र काम करीत आहेत. राज्यातील योजना शंभर टक्के राबविण्यात यशस्वी झालो आहोत. आम्ही विविध योजना लोकांपर्यंत नेल्या आहेत. ‘माझे घर’ योजनेचा शुभारंभ शनिवारी होणार आहे. ही योजना यशस्वी झाल्यास घरात सुख लाभणार आहे. ‘गावांचा विकास’ हे गांधींनी पाहिलेले स्वप्नही आम्ही सत्यात आणण्याचे काम करीत आहोत, मुख्यमंत्री सावंत म्हणाले.