Rahul Gandhi: राहुल गांधींनी निवडणूक आयोगाला घेरले; 'मतदार याद्यांमध्ये जाणूनबुजून फेरफार...'

काँग्रेस नेते राहुल गांधी यांनी पुन्हा एकदा भारताच्या निवडणूक आयोगावर गंभीर आरोप करत थेट मुख्य निवडणूक आयुक्त (CEC) ज्ञानेश कुमार यांच्यावर निशाणा साधला आहे. 'आयोगाने जाणूनबुजून आणि लक्ष्य करून देशातील लाखो मतदारांची नावे मतदार यादीतून हटवली,' असा सनसनाटी आरोप त्यांनी गुरुवारी केला. हे आरोप सिद्ध करण्यासाठी आपल्याकडे 'नकारता न येण्यासारखे पुरावे' आणि 'ब्लॅक अँड व्हाईट'मध्ये प्रमाण असल्याचा दावाही त्यांनी केला.

राहुल गांधी यांनी आपल्या आरोपांना बळकटी देण्यासाठी कर्नाटक आणि महाराष्ट्रातील विधानसभा मतदारसंघांचे उदाहरण दिले. त्यांनी म्हटले की, "कर्नाटकातील आलंद विधानसभा मतदारसंघामध्ये २०२३ च्या विधानसभा निवडणुकीत ६,०१८ मते जाणीवपूर्वक वगळण्यात आली. आलंद हा काँग्रेसचा एक मजबूत मतदारसंघ आहे, म्हणूनच त्याला लक्ष्य करण्यात आले." महाराष्ट्रातील राजुरा विधानसभा मतदारसंघातही अशाच प्रकारे मतांची फेरफार करण्यात आल्याचे त्यांनी म्हटले.