म्हार्दोळमध्ये घरात घुसलेल्या बिबट्याचा संशयास्पद मृत्यू

फोंडा : म्हार्दोळ परिसरात घराशेजारी असलेल्या खोपट्यामध्ये घुसलेल्या बिबट्याचा संशयास्पद मृत्यू झाला आहे. बिबट्या भरवस्तीत घुसल्याने एकच खळबळ उडाली होती. बिबट्याच्या वावरामुळे परिसरात भीतीचं वातावरण पसरलं आहे. बिबट्याचं दर्शन होताच वनविभागाला घटनेची माहिती देण्यात आली. बिबट्याला जेरबंद केल्यानंतर काहीवेळातच त्याचा मृत्यू झाल्याची माहिती आहे. सकाळपासूनच या बिबट्याला पाहण्यासाठी परिसरातील नागरिकांची मोठी गर्दी झाली होती. (Leopard suspicious death in mardol News Updates)

बागवाडा सिमेपाईण म्हार्दोळ (Mhardol) येथील रामदास नाईक यांच्या घराला लागून असलेल्या लाकूड साठा केलेल्या खोपटीत बिबट्या लपून बसला होता. सकाळी रामदास देवपूजा करण्यासाठी फुले काढण्यासाठी गेले असता हा बिबट्या (Leopard) खोपटीत निवांत पडलेला दिसल्याने त्यांची चांगलीच घाबरगुंडी उडाली. त्यांनी लगेच परिसरातील इतरांना याबाबत माहिती दिली आणि पोलीस तसेच वन खात्याला कळवण्यात आले.

बिबट्या आढळल्याने हा परिसर सील करण्यात आला होता. वन (Forest) खात्याचे अधिकारी आणि कर्मचारी जाळे, गुंगीचे इंजेक्शन यासारखे साहित्य घेऊन घटनास्थळी आले आणि त्यांनी बिबट्याला जेरबंद केलं. बिबट्याने परिसरातील कुत्र्याची तीन पिल्ले फस्त केल्याची माहिती स्थानिकांनी दिली. कुत्र्याला पकडण्यासाठीच हा बिबट्या भर लोकवस्तीत आला असावा असा अंदाज व्यक्त करण्यात आला होता. बिबट्याच्या मानेवर जखमा दिसल्याने त्याच्या मृत्यूचा संशय बळावला आहे. वनविभागाने याप्रकरणी चौकशीचे आदेश दिले आहेत.