‘आठ दिवसांत चौकशी सुरु करा, अन्यथा...’; आजी – माजी आमदरांच्या गांजा आरोपावरुन काँग्रेस खासदाराचा मुख्यमंत्र्यांना इशारा

पणजी: पेडण्याच्या आजी – माजी आमदारांनी एकमेकांवर गांजावरुन आरोप केले. या आरोपानंतर राज्यात खळबळ निर्माण झाली. आप नेते अमित पालेकरांनी याप्रकरणी चौकशी न झाल्यास एनसीबीकडे तक्रार दाखल करण्याचा इशारा दिल्यानंतर आता काँग्रेस खासदार विरियातो फर्नांडिस यांनी याबाबत थेट मुख्यमंत्र्यांना इशारा दिला आहे.

माजी आमदार बाबू आजगावकरांनी विद्यमान आमदार प्रवीण आर्लेकरांवर गंभीर आरोप केला. गांजा विक्री करणारा व्यक्ती आमदार असल्याचे आजगावर म्हणाले. होते. यावरुन आर्लेकरांनी प्रत्युत्तर देताना आजगावकरांचा मुलगा डिस्कोत गांजा विक्री करतो असा आरोप केला.

याप्रकरणी मुख्यमंत्री प्रमोद सावंत यांनी गंभीर दखल घेऊन आठ दिवसांत चौकशी करावी, अशी मागणी विरियातो फर्नांडिस यांनी केली आहे.

 “आमदार आर्लेकर आणि माजी उपमुख्यमंत्री आजगावकरांनी गांजावरुन एकमेकांवर आरोप केले. आठ मुख्यमंत्र्यांनी याप्रकरणी चौकशी सुरु करवी, अन्यथा आम्ही याप्रकरणी तक्रार दाखल करु,” असा इशारा विरियातो यांनी दिला आहे.

यापूर्वी आप नेते अमित पालेकरांनी देखील नार्कोटिक्स कंट्रोल ब्युरोकडे तक्रार दाखल करण्याचा इशारा दिला आहे.

“राज्यात अमली पदार्थ तस्करी आणि विक्रीचे प्रमाण वाढले आहे. भाजपचे दोन नेते आजी – माजी आमदार एकमेकांवर गांजा विक्रीचे आरोप करतात. याचे व्हिडिओ सोशल मिडियावर उपलब्ध आहेत. सामान्य नागरिकाने असे आरोप केले असते तर आत्तापर्यंत चौकशी झाली असते,” असेही पालेकर म्हणाले.