मांद्रे माजी सरपंचांवरील हल्ला प्रकरण, सर्व आरोपी कर्नाटकातून अटक; गोव्यातील ठळक बातम्या

मांद्रेचे माजी सरपंच महेश कानोडकर यांच्यावरील प्राणघातक हल्ल्याप्रकरणी विश्वनाथ हरिजन, सुरेश नाईक, साईराज गोवेकर, फ्रँकी नाडर, मनीष हडफडकर, आणि उद्देश शेट्टी यांना अटक करण्यात आली.

राज्याचे कामगारमंत्री बाबूश मोन्सेरात यांनी कृती दलाची बैठक घेतली. खासगी नोकऱ्यांमध्ये स्थानिकांना आरक्षण, स्थानिक कामगारांतील कौशल्य विकासासह खासगी क्षेत्रातील नोकऱ्यांच्या प्रश्नांबाबत बैठकीत चर्चा करण्यात आली.

न्यायाधीश जाधव आयोगाच्या अहवालात जमीन हडप प्रकरणात नावे असलेल्यां नोटरींवर कायदेशीर कारवाई होणार. सेवा बडतर्फ करण्याची प्रक्रिया सुरु केल्याचेही राज्याचे कायदामंत्री आलेक्स सिक्वेरा यांनी सांगितले.

राज्यात पुन्हा एकदा अवकाळी पावसानं धूमशान घातलं आहे. साखळी, माशेल, कुडचडेसह इतर भागात पावसानं हजेरी लावली. हवामान विभागाकडून शुक्रवारी (6 डिसेंबर) साठी यलो अलर्ट जारी करण्यात आला आहे.

विश्व हिंदू परिषद-बजरंग दल आयोजित रविवार 8 डिसेंबर रोजी सावर्डे- कुडचडे येथे होणाऱ्या गीता जयंतीनिमित्त शौर्य यात्रेचे ब्रह्मेशानंद स्वामींना निमंत्रण.

चेक बाऊन्स प्रकरणी रोहन हरमलकरविरुद्ध अजामीनपात्र वॉरंट जारी करण्यात आले होते. पर्वरी पोलिसांनी हरमलकरला अटक करुन न्यायालयात हजर केले. नुकतेच हरमलकर याला एका वादग्रस्त मालमत्तेच्या प्रकरणात अटक करुन जामीन मिळाला होता.

2027 मध्ये गोवा विधानसभेची निवडणूक होणार आहे. यासाठी राजकीय पक्षांनी आतापासूनच तयारी सुरु केली आहे. भाजपला शह देण्यासाठी राज्याती विरोधक एकवटणार का? अशी चर्चा सुरु झाली आहे. तत्पूर्वीच, गोवा आदमी पक्षाचे आमदार व्हेंझी व्हिएगस यांनी काँग्रेससोबतच्या आघाडीवर भाष्य केलं. आमच्या दिल्ली दौऱ्यात आम्ही काँग्रेस नेतृत्वाशी आघाडीच्या मुद्द्यावर चर्चा केली आहे. आम्ही त्यांना गोवा काँग्रेसचे कामकाज कसे चालते याची माहिती दिली आहे. एकत्र येण्याची हीच वेळ आहे. मात्र काँग्रेसने नेहमीप्रमाणे शेवटच्या क्षणी हात पाय मारण्याचा प्रयत्न केल्यास त्यांचा गोव्यातून सफाया होईल, असे आमदार व्हिएगस म्हणाले.

गोव्यात होमगार्डची एकूण संख्या 1,230 आहे या 945 पैकी पुरुष आणि 285 महिला आहेत. याव्यतिरिक्त, 143 पदांची भरती सुरू आहे. गोवा सरकारने पोलिस कॉन्स्टेबल पदासाठी होमगार्डसाठी 10% आरक्षण ठेवले आहे. होमगार्ड जर त्यांच्या सेवेत चांगले काम करत असतील तर त्यांना बक्षिसेही दिली जावीत: डीजीपी आलोक कुमार

मोले पंचायत सरपंच म्हणून सुहास गांवकर यांची बिनविरोध निवड. सर्व पंचाना विश्वासात घेऊन आमदार डॉ. गणेश गांवकर याच्या मार्गदर्शनखाली गावातील विकास करणार असे नवनिर्वाचित सरपंच सुहास गांवकर यांनी सांगितले.

राज्यात सध्या एकीकडे कडाक्याची थंडी असताना दुसरीकडे अवकाळी पावसानं दस्तक दिली आहे. हवामान विभागाकडून शुक्रवारी (6 डिसेंबर) यलो अलर्ट जारी केला आहे. दोन्ही जिल्ह्यात वादळी वाऱ्यासह मुसळधार पावसाची शक्यता हवामान विभागाकडून वर्तवण्यात आली आहे.

धारगळ पंचायतीने सनबर्न फेस्टिव्हलला दिलेल्या न हरकत दाखल्यास उच्च न्यायालयात आव्हान देण्यात आले आहे. येत्या 9 डिसेंबर रोजी या प्रकरणावर सुनावणी होणार.

लिफ्ट पडली महागात. दुचाकीवरुन पडल्याने महिला जखमी. 'स्पीडब्रेकर'वर दुचाकीला धक्का बसताच मागे बसलेली महिला रस्त्यावर पडली. डिचोलीत अपघात.