पणजी: खासगी दुचाकींचा भाडी मारण्यासाठी वापर केल्यास अशा दुचाकी जप्त करण्याचे आदेश पोलिसांना देण्यात आल्याचे सांगत, वयाची ५० वर्षे पूर्ण केलेल्या मोटारसायकल पायलटांना येत्या १ ऑगस्टपासून दयानंद सामाजिक सुरक्षा योजनेचा (डीएसएसवाय) लाभ देण्याची घोषणा मुख्यमंत्री डॉ. प्रमोद सावंत यांनी केली.
वाहतूक खाते आणि मोटारसायकल पायलट संघटनेतर्फे पायलटांसाठी सुरू केलेल्या ‘माझे ड्रायव्हर’ या मोबाईल ॲपच्या शुभारंभप्रसंगी बोलत होते.पणजीत आयोजित या कार्यक्रमाला वाहतूक मंत्री माविन गुदिन्हो, संघटनेचे अध्यक्ष सुरेश ठाकूर यांच्यासह वाहतूक खात्याचे अधिकारी उपस्थित होते.
मोटारसायकल पायलट हे गोव्याच्या पर्यटनाचे ‘ब्रँड ॲम्बेसेडर’ आहेत. अशा पायलटांचा आकडा पाच हजारांहून दोन हजारांवर आला आहे. या व्यवसायात अधिकाधिक जणांनी यावे, यासाठी सरकारने पायलट व्यवसायातही डिजिटल क्रांती घडवून आणण्यास सुरुवात केली. त्याचाच भाग म्हणून ‘माझे ड्रायव्हर’ ॲप सुरू करण्यात आले आहे.
या ॲपमुळे सर्वसामान्य जनता तसेच पर्यटकांना आवश्यक तेथे पायलट सेवा मिळवता येणार आहे, असे मुख्यमंत्री म्हणाले. इलेक्ट्रिक दुचाकीवर ५० टक्के सबसिडी ज्या मोटारसायकल पायलटांना इलेक्ट्रिक दुचाकींचा वापर करायचा आहे, त्यांना इलेक्ट्रिक दुचाकींवर ५० टक्के सबसिडी देण्यात येणार आहे. त्याचाही पायलटांनी लाभ घ्यावा, असे आवाहनही प्रमोद सावंत यांनी केले.
‘रेनकोट घ्यावे, घरी जावे’
‘‘माझे ड्रायव्हर’ ॲप अनिवार्य नसून ऐच्छिक आहे. ज्यांना ॲपअंतर्गत यायचे नसेल, त्यांना पूर्वीप्रमाणे भाडी मारता येईल. असे असतानाही या ॲपबाबत संभ्रम निर्माण करण्याचा प्रयत्न काही जणांकडून होत आहे. ज्यांना ॲपमध्ये यायचे नाही, त्यांनी ‘रेनकोट घ्यावे आणि घरी जावे’,’’ असा सल्लाही मुख्यमंत्री डॉ. प्रमोद सावंत यांनी दिला.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
