Kushavati District Six Assembly Seats: कुशावती मतदारसंघांच्या मुद्द्यावरून गोव्यात राजकीय वाद! 8 पैकी 6 जागा जिंकण्याच्या काँग्रेसच्या दाव्यावर गोवा फॉरवर्ड अन् भाजपचा जोरदार हल्ला

मडगाव: काँग्रेसचे कुशावती जिल्हाध्यक्ष राजेश वेरेकर यांनी कुशावती जिल्ह्यातील आठपैकी सहा विधानसभा मतदारसंघ जिंकण्याचा दावा केल्यानंतर त्यावरून राजकीय वाद निर्माण झाला आहे. गोवा फॉरवर्ड पक्षाचे मुख्य प्रवक्ते प्रशांत नाईक यांनी कुशावती जिल्ह्यात प्रत्यक्षात पाचच विधानसभा मतदारसंघ असताना सहा मतदारसंघ जिंकण्याचा दावा कसा केला, असा सवाल उपस्थित केला.

गोव्याचा इतिहास आणि भूगोल माहीत नसलेल्या व्यक्तीची काँग्रेसने जिल्हाध्यक्षपदी नियुक्ती केली आहे का, अशी टीकाही त्यांनी केली. या टीकेला प्रत्युत्तर देताना राजेश वेरेकर यांनी महसुली कुशावती जिल्ह्यात पाच मतदारसंघ असल्याचे मान्य केले. मात्र, काँग्रेसच्या संघटनात्मक रचनेनुसार कुशावती जिल्ह्यात शिरोडा, फोंडा आणि मडकई या मतदारसंघांचाही समावेश असल्याने एकूण आठ मतदारसंघांचा विचार केला जात असल्याचे त्यांनी स्पष्ट केले.

भाजपचे समाजमाध्यम प्रभारी शुभम पार्सेकर यांनीही काँग्रेसच्या दाव्यावर टीका केली. त्याला उत्तर देताना युवा काँग्रेसचे अध्यक्ष अर्चित नाईक यांनी काँग्रेसच्या संघटनात्मक विभागणीची माहिती न घेता भाजपने लोकांची दिशाभूल करू नये आणि सरकारच्या कारभाराकडे लक्ष द्यावे, असा पलटवार केला.

काँग्रेस आत्मविश्वासाने दावा करत आहे की, ते कुशावतीमधील ८ पैकी ६ जागा जिंकतील, तर कुशावतीमध्ये केवळ ५ विधानसभा जागा आहेत. त्यामुळे ते सहा जागा जिंकतील कसे? काँग्रेसने केलेला हा दुसरा सर्वात अवास्तव दावा आहे, हे आता स्पष्ट झाले आहे. यापूर्वी काँग्रेसने गोव्यात आपण २७ जागा जिंकणार, असा अवास्तव दावा केला होता.

- शुभम पार्सेकर, भाजप, सोशल मीडिया प्रभारी