Goa Winter: राज्यात हुडहुडी कायम! पुढील 4 दिवस कसे राहणार तापमान? वाचा..

पणजी: राज्यात पूर्वेकडून वाहणाऱ्या वाऱ्याची तीव्रता वाढल्याने मागील दोन-तीन दिवसांपासून हुडहुडी भरविणारी थंडी पडत आहे. सोमवारी १८ अंश सेल्सिअस इतक्या किमान तापमानाची नोंद करण्यात आली. जी सामान्य तापमानाच्या तुलनेत ३.८ अंश सेल्सिअस तापमानाची घट नोंदविण्यात आली.

पुढील चार दिवस राज्यात थंडी कायम राहणार असून पारा १८ ते १९ अंश सेल्सिअस दरम्यान राहण्याची शक्यता गोवा वेधशाळेने वर्तविली आहे. राज्यात वाढती थंडी, रात्री आणि पहाटे पडणाऱ्या धुक्याच्या अनुषंगाने नागरिकांनी योग्य ती काळजी घ्यावी.

घराबाहेर पडताना ऊबदार कपडे घालावेत. धुक्यामध्ये वाहन चालविताना योग्य ती काळजी घेण्याचे आवाहन करण्यात आले आहे. राज्यात मागील काही भागात थंडीचा जोर मोठ्या प्रमाणात असून इलेक्ट्रीक गॅजेड, मोबाईलवर तापमानाचा पारा १५ अंश सेल्सिअस नोंद करण्यात येत आहे.

अनेक ठिकाणी पाणथळ भागात तसेच घाटालगतच्या भागात थंडीचा प्रभाव अधिक आहे. वाढत्या थंडीमुळे सर्दी, खोकला, ताप येणे, त्वचा फुटणे आदी प्रकार वाढले असून नागरिकांनी योग्य ती काळजी घ्यावी, असे आवाहन करण्यात आले आहेत.

राज्यात पूर्वेकडून वाहणाऱ्या वाऱ्याच्या प्रभावामुळे थंडीचा जोर वाढला असून पुढील काही दिवस थंडी कायम राहणार आहे. पुढील चार दिवस किमान तापमानाचा पारा १८ ते १९ अंशांपर्यंत राहणार असून नागरिकांनी योग्य ती काळजी घ्यावी.

- नहुष कुलकर्णी, संचालक, गोवा वेधशाळा