ड्रिंक अँड ड्राईव्ह करु नका, हेल्मेट घाला; गोव्यात आलेल्या पर्यटकांसाठी पोलिसांची नियमावली, पालन न केल्यास होणार कारवाई

Traffic Advisory For Tourist In Goa

पणजी: गोव्यात सनबर्न, थर्टी फर्स्ट आणि नव्या वर्षाच्या स्वागतासाठी मोठ्या प्रमाणावर देशी - विदेशी पर्यटक दाखल झाले आहेत. राज्यात पर्यटकांची वर्दळ वाढल्याने अनेक मुख्य ठिकाणे आणि प्रमुख मार्गावर गर्दी पाहायला मिळत आहे. अशात अपघातांची शक्यता देखील वाढली असून, पोलिसांनी राज्यातील पर्यटकांसाठी नियमावली जाहीर केली आहे. तसेच, या नियमांचे उल्लंघन केल्यास कारवाईचा इशारा दिला आहे.

वाहतूक पोलिसांनी जाहीर केलेली नियमावली खालीलप्रमाणे

१) वाहतूक नियमांचे पालन करुन वाहन धारकांनी वाहने चालवावीत

२) दुचाकी चालकांसाठी हेल्मेटचा वापर बंधनकारक आहे.

३) जबाबदारपणे आणि सुरक्षित ड्रायव्हिंग करा.

४) वाहन चालवताना मोबाईलचा वापर करु नका

५) दारु पिऊन वाहन चालवू नका

६) वाहन पार्क करताना, पार्किंग नियमाचे पालन करा. तसेच, नियमित केलेल्या पार्किंग जागेत पार्किंग करा. बेशिस्तपणे पार्किंग करु नये.

७) वाहतूक नियमांचे उल्लंघन करणाऱ्यांवर नियमानुसार कारवाई केली जाईल.

गोव्यात गेल्या आठवड्यात विविध अपघातात सहा ते सात जणांचा बळी गेला आहे. तसेच, दोन अपघातात ट्रक थेट घरांवर जाऊन धडकल्याची घटना उघडकीस आली आहे. राज्यात पर्यटकांची संख्या वाढल्याने प्रमुख रस्त्यावरील वाहनांची वर्दळ वाढलीय, तसेच प्रमुख पर्यटन स्थळांवर गर्दीत वाढ झाली.

अशात अपघाताच्या घटना समोर येऊ लागल्या आहेत. या पार्श्वभूमीवर खबरदारीचा उपाय म्हणून गोवा पोलिसांच्या वाहतूक खात्याने नियमावली जाहीर केली आहे.