Minister Govind Gaude: गावडेंविरुद्ध काँग्रेसची पोलिसांत लेखी तक्रार

Minister Govind Gaude: सभापती रमेश तवडकर यांनी मंत्र्यावर केलेला भ्रष्टाचाराचा आरोप सिद्ध करावा, अन्यथा त्यांनी आपले पद सोडावे. मंत्री आणि सभापतींनी प्रदेशाध्यक्ष सदानंद शेट तानावडे यांचा सहारा घेतल्याने त्यांचाही यात सहभाग आहे का?

असा सवाल काँग्रेसचे प्रवक्ते विजय भिके यांनी केला आहे. त्यांच्या अध्यक्षतेखाली शिष्टमंडळाने आज पणजी पोलिस स्थानकात मंत्री गोविंद गावडे यांच्याविरोधात लेखी तक्रार दिली. याप्रसंगी जॉन नाझारेथ, श्रीपाद धोंड, ॲड. जितेंद्र गावकर, प्रणव परब यांची उपस्थिती होती.

मंत्री गावडे यांनी एससी-एसटी आयोगाच्या चेअरमनविरुद्ध जी भाषा वापरली आहे, त्याविरोधात प्रदेश काँग्रेस समितीच्या आदिवासी काँग्रेसचे चेअरमन रामकृष्ण जल्मी यांनी ही तक्रार दिली आहे. या तक्रारीविषयी माहिती देताना जल्मी म्हणाले, मंत्री गावडे एससी-एसटी आयोगाच्या चेअरमनला धमकी देतात.

मंत्री गावडे आणि सभापती तवडकर हे आदिवासी समाजाचेच आहेत. चेअरमनला धमकी देणे, वाईट शब्द वापरणे योग्य नाही. मंत्री गावडे हे विविध भ्रष्टाचारात अडकले आहेत. गोव्यासाठी आणि समाजासाठी ही बाब लज्जास्पद असून सरकारने मंत्री गावडे यांना पदावरून हटवावे, अशी आमची मागणी आहे.

भिके म्हणाले, सभापतींनी अधिवेशनाच्या दिवशीच भ्रष्टाचाराचा विषय काढला आहे, त्यावरून हे सरकार भ्रष्टाचारात बुडालेले असल्याचा आमचा आरोप आहे, तो यावरून खरा ठरला आहे. विधानसभेच्या सभागृहात सभापती भ्रष्टाचाराची जाहीर वाच्यता करतात आणि प्रदेशाध्यक्ष तानावडे ही आमची पक्षाची अंतर्गत बाब असल्याचे सांगतात हे चुकीचे आहे.

मुख्यमंत्र्यांच्या घरी बैठक होऊन हा वाद मिटल्याचे सांगितले जाते, तो वाद कसा मिटविला? असा सवाल त्यांनी केला. केवळ आमदारांचा येथेच वाद झालेला नाही, दिल्लीच्या गोवा निवासातही आमदारांचे वाद झालेले आहेत आणि ते कशावरून हे सर्वांना माहीत आहे. अधिकारी, मंत्र्यांचे फोन रेकॉर्ड होतात कसे? आणि ते बाहेर येतात कसे, असा सवालही त्यांनी केला.

जेव्हा जेव्हा भाजप सरकार येते, तेव्हा भ्रष्टाचार हा ठरलेला आहे. त्यामुळे जनतेने त्याचा विचार करावा. त्याचबरोबर विधानसभेत या मंत्री व सभापतींवर कारवाई व्हायला हवी. लोकशाहीनुसार सभापती वागत नाही, विधानसभेचे कामकाज आपल्या मर्जीने चालवतात, असा आरोपही भिके यांनी केला.