राज्य सरकार सर्व व्यवहारात पारदर्शक असून सरकारी पातळीवर कोणत्याही कामांसाठी बेकायदेशीर पैसे आकारले जात नाहीत.
सरकारी नोकरीसाठी, सरकारच्या खात्यात गाडी लावण्यासाठी किंवा इतर कामांसाठी कोणी पैशाची मागणी करत असल्यास सार्वजनिक तक्रार विभागाकडे किंवा सीएमओकडे तक्रार करावी, त्या तक्रारीची योग्य दखल घेऊन कारवाई केली जाईल, अशी प्रतिक्रिया मुख्यमंत्री डॉ. प्रमोद सावंत यांनी साखळी येथे पत्रकारांशी बोलताना व्यक्त केली.
नोकरीचे आमिष दाखवून अनेकांकडून पैसे लुटणाऱ्या दोघांना अटक केल्याप्रकरणी मुख्यमंत्री डॉ. प्रमोद सावंत यांना पत्रकारांनी प्रश्न विचारला असता त्यांनी वरील प्रतिक्रिया दिली. या प्रकरणी तक्रार करणाऱ्यांचे तसेच योग्य कारवाई करून दोघांना अटक केल्याप्रकरणी पोलिसांचेही मुख्यमंत्र्यांनी अभिनंदन केले.
अशी प्रकरणे जर कुठेही दृष्टीस पडली किंवा निदर्शनास आली, तर थेट तक्रार सादर करावी. या तक्रारींसाठी तक्रार विभागाचे विविध क्रमांक जाहीर केलेले आहेत. त्यावर तक्रारी कराव्यात. अन्यथा सीएमओच्या संकेतस्थळावर तक्रार करावी.
जर अशा तक्रारींची कोणताही सरकारी अधिकारी दखल घेत नसल्यास थेट आपल्याकडे तक्रार करावी, आपण स्वतः लक्ष घालू, असेही मुख्यमंत्री डॉ. सावंत यांनी सांगितले.
गैरकृत्ये करणाऱ्यांकडून नाहक बदनामी
सरकारच्या नावाखाली अनेकजण विविध कामांचे आमिष दाखवून गरीब लोकांकडून पैसे उकळतात. हे सरकार पारदर्शी असून लोकांच्या कामांसाठी पैशांची अपेक्षा करत नाही. सरकार लोकांची कामे करण्यासाठी सक्षम असून अशी कृत्ये करणारे सरकारला नाहक बदनाम करतात. त्यांची यापुढे गय केली जाणार नाही, असे मुख्यमंत्र्यांनी सांगितले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
