Calangute Crime News: कळंगुट पोलिसांना फोन आला अन्... कारचे दार उघडताच बसला मोठा धक्का; 41 वर्षीय व्यक्तीचा संशयास्पद मृत्यू

म्हापसा: कळंगुट येथील फुटबॉल मैदानाजवळ उभ्या असलेल्या एका स्विफ्ट कारमध्ये एका व्यक्तीचा मृतदेह संशयास्पद स्थितीत आढळून आल्याने परिसरात खळबळ उडाली आहे. मृत व्यक्तीची ओळख षण्मुखा शिवपुत्रा भाविमणी (वय ४१, रायचूर जिल्हा, कर्नाटक) अशी पटली आहे.

मिळालेल्या माहितीनुसार, पणजी पीसीआरला एका नागरिकाचा फोन आला होता. कळंगुट फुटबॉल मैदानावर उभ्या असलेल्या स्विफ्ट कारच्या मागील सीटवर एक व्यक्ती बेशुद्ध अवस्थेत पडून असल्याची माहिती या फोनवरून देण्यात आली होती. माहिती मिळताच कळंगुट पोलिस ठाण्याच्या पथकाने तत्काळ घटनास्थळी धाव घेतली. तेथे पाहणी केली असता कारच्या मागील सीटवर संबंधित व्यक्ती मृत अवस्थेत आढळून आली.

पोलिस प्रशासनाने तातडीने घटनास्थळी धाव घेत पंचनामा केला. यावेळी न्यायवैद्यक प्रयोगशाळेच्या पथकालाही पाचारण करण्यात आले होते. प्राथमिक तपासात मृतदेहावर कोणत्याही दुखापतीच्या खुणा आढळून आलेल्या नाहीत. सर्व आवश्यक कायदेशीर प्रक्रिया पूर्ण केल्यानंतर मृतदेह बांबोळी येथील गोवा वैद्यकीय महाविद्यालयाच्या शवागारात पाठविण्यात आला.

मित्रांसोबत आले होते गोव्यात

दरम्यान, मृत षण्मुखा हे त्यांच्या दोन मित्रांसोबत गोव्यात आले होते. “मी दोन दिवस राहून परत येतो,” असे सांगून ते मित्रांपासून वेगळे झाले होते. मात्र, काही दिवसांनंतर थेट कारमध्येच त्यांचा मृतदेह आढळून आला. याप्रकरणी पोलिसांनी आकस्मिक मृत्यूची नोंद केली असून, मृत्यूचे नेमके कारण शोधण्यासाठी पोलिस पुढील तपास करत आहेत.