तृणमूलच्या ‘त्या’ कार्टूनवर भाजपची आक्रमक भुमिकी

पणजी: तृणमूल काँग्रेसच्या ‘गोंयची नवी सकाळ’ या ट्विटर हॅण्डलवर अपलोड आणि नंतर काढलेल्या कार्टूनबाबत भाजपाने खूपच गंभीर दखल घेतली आहे. सोमवारी रात्री उशिरा झालेल्या भाजप आणि गट मंडळाच्या बैठकीमध्ये राज्यात ठिकठिकाणी निषेध करण्याचे ठरविण्यात आल्याची माहिती प्रदेशाध्यक्ष सदानंद शेट तानवडे यांनी दिली.

गोवा हा शांतताप्रीय आणि सर्वधर्मसमभाव प्रदेश असल्याने राज्यातील आगामी निवडणुकाही अशाच प्रकारच्या व्हाव्यात, अशी भावना भाजपची आहे. त्यामुळे कोणत्याही राजकीय पक्षाला किंवा व्यवस्थेला चिरडून टाकण्याची ही भावना निषेध करण्यासारखी आहे. पंतप्रधान, गृहमंत्री आणि मुख्यमंत्र्यांना पायाखाली चिरडण्याचे चित्रं उभे करणे, ही तृणमूलची हिसंक वृत्तीचे दर्शन घडविते. अशा हिंसक वृत्तीच्या लोकांना गोमंतकीय स्थान देणार नाहीत, हे तृणमूलने समजून घ्यावे, असेही तानावडे यांनी सांगितले.

तृणमूल काँग्रेसच्या ‘गोंयची नवी सकाळ’ या ट्विटर हॅण्डलवरून रविवारी नवे वादंग उठले होते. या ट्विटमध्ये त्यांनी ममता बॅनजी आपल्या पायातील चपलेखाली पंतप्रधान नरेंद्र मोदी, (PM Modi) केंद्रीय गृहमंत्री अमित शहा (Amit Shah) आणि गोव्याचे मुख्यमंत्री डॉ. प्रमोद सावंत (CM Pramod Sawant) यांना चिरडत आहेत, अशा आशयाचे एक पोस्टर अपलोड केले होते. या पोस्टरबाजीमुळे काल दिवसभर समाज माध्यम ढवळून निघाले आणि अनेकांनी तृणमूलच्या या कृत्याची निंदाही केली. टीकेच्या भडिमारानंतर ‘तृणमूल’ने दुसऱ्या दिवशी सकाळी 9 वाजता शेअर केलेले ट्विट अखेर मागे घेतले. तृणमूलच्या या कृत्याची भाजपने गंभीर दखल घेतली असून त्यांच्यावर कायदेशीर कारवाई करण्याचा इशाराही त्यांनी दिला होता.

ममता बॅनर्जी आणि तृणमूल काँग्रेसने माफी मागितली पाहिजे अन्यथा आम्ही त्यांचे कार्यक्रम होऊ देणार नाही. हा आमचा इशारा आहे.

- उर्फान मुल्ला, प्रवक्ते भाजप.