BOIचे कर्मचारी कोरोनाबाधित, शाखा बंद

पणजी : गोव्यात सध्या कोरोना (Covid-19) रुग्णांची संख्या वाढतच चालल्याचं चित्र आहे. यातच ओमिक्रॉनचे रुग्णही गोव्यात (Goa) सापडू लागले आहेत. यातच भर म्हणजे बँक ऑफ इंडियाच्या (BOI) कांपाल शाखेतील कर्मचारी कोरोनाबाधित असल्याचं समोर आलं आहे. त्यामुळे खातेदारांच्या सुरक्षिततेसाठी शाखा बंद ठेवण्याचा निर्णय घेण्यात आला आहे.

दरम्यान बँक (Bank) ऑफ इंडियाच्या कांपाल शाखेबाहेर नेहमीप्रमाणेच खातेदारांची रांगही पाहायला मिळाली. मात्र खातेदारांना बँकेबाहेर नोटीस लावलेली पाहायला मिळाली, ज्यात लिहिलं आहे की, बँक ऑफ इंडियाच्या कांपाल शाखेत कोरोनाचा (covid 19) संसर्ग झाल्याने आपल्या सुरक्षिततेसाठी आणि पुढील प्रसार रोखण्यासाठी खबरदारीचा उपाय म्हणून शाखा तात्पुरत्या स्वरुपात बंद करण्यात आली आहे. ही बाब मनपा आणि प्रशासनाच्या निदर्शनास आणली असून ग्राहकांना विनंती आहे की त्यांनी आपली कामं बँकेच्या नजिकच्या शाखांमधून करुन घ्यावीत.

कोरोनाचा (Corona) प्रसार बँकांप्रमाणेच कसिनो, हॉटेल्स, मॉल्स यासारख्या ठिकाणीही वाढण्याची चिन्हं आहेत. मात्र अद्यापही सरकारने कोणतीही ठोस पावलं उचलली नसल्याचं चित्र आहे. पर्यटकांचीही गोवा (Goa) राज्यात येजा सुरुच असल्याने कोरोनाचा धोका आणखी वाढत चालला आहे. त्यामुळे सरकारने ठोस उपाययोजना करण्याची मागणी नागरिकांमधून होत आहे.