GCA Cricket League: जीनो स्पोर्टसची आश्वासक सुरुवात! सैफ, दीपराज यांची शतके; 262 धावांची अभेद्य भागीदारी

पणजी: महंमद सैफ (१६४) व कर्णधार दीपराज गावकर (११४) यांनी नाबाद शतके नोंदविताना चौथ्या विकेटसाठी २६२ धावांची अभेद्य भागीदारी केली, त्यामुळे गोवा क्रिकेट असोसिएशनच्या प्रीमियर लीग क्रिकेट सामन्यात जीनो स्पोर्टस क्लबने पहिल्या दिवसअखेर वर्चस्व राखले.

स्पर्धेतील तीन दिवसीय सामन्यास रविवारी पर्वरी येथील जीसीए अकादमी मैदानावर सुरवात झाली. एमसीसी संघाविरुद्ध जीनो क्लबने पहिल्या दिवसाचा खेळ थांबला तेव्हा ३ बाद ३१३ धावा केल्या होत्या. सैफ याने २४३ चेंडूंतील खेळीत १४ चौकार व पाच षटकार मारले. दीपराज याने २२७ चेंडूंचा सामना करताना आठ चौकार व एक षटकार लगावला. ३ बाद ५१ वरून त्यांनी संघाला भक्कम स्थिती गाठून दिली.

चौगुले क्लब सुस्थितीत

स्पर्धेत सांगे येथील जीसीए मैदानावर उशिरा सुरवात झालेल्या लढतीत धेंपो क्रिकेट क्लबविरुद्ध चौगुले स्पोर्टस क्लबने पहिल्या दिवसअखेर ६६ षटकांत २ बाद १८८ अशी दमदार स्थिती गाठली. दिवसअखेर क्षितिज पटेल ८२, तर मनन हिंग्राजिया ४० धावांवर खेळत होता. त्यांनी तिसऱ्या विकेटसाठी ९१ धावांची अभेद्य भागीदारी केली आहे. त्यापूर्वी आर्यन नार्वेकरने ३८, तर रिजुल पाठक याने २४ धावा. धेंपो क्लबसाठी दोन्ही गडी मनीष काकोडे याने बाद केले.

यश कसवणकरची झुंझार फलंदाजी

चिखली-वास्को येथील मैदानावर युवा गुणवान अष्टपैलू यश कसवणकर (नाबाद ८७) याच्या झुंझार फलंदाजीमुळे पणजी जिमखान्याविरुद्ध साळगावकर क्रिकेट क्लबला पहिल्या डावात दिवसअखेर ७ बाद २१५ असे सावरता आले. साळगावकर क्लबची अगोदर ४ बाद १७ व नंतर ५ बाद ४३ अशी घसरगुंडी उडाली. प्रतिकुल परिस्थितीत यश याने आदित्य सूर्यवंशी (४४) याच्यासमवेत सहाव्या विकेटसाठी १०५ धावांची भागीदारी केली, नंतर विनय चौधरी (२४) याच्यासमवेत त्याने सातव्या विकेटसाठी ४६ धावांची भर टाकली. यश याने २६४ चेंडूंचा सामना करताना सहा चौकार व एक षटकार मारला. पणजी जिमखान्याच्या हेरंब परब (११-२-१६-४) याने भेदक मारा केला.