Goa Cricket Association's Secretary Rohan Desai: दक्षिण विभागीय क्रिकेट संघटनांच्या 2023-24 मोसमासाठी गोवा क्रिकेट असोसिएशनचे (जीसीए) सचिव रोहन गावस देसाई यांची निमंत्रकपदी बिनविरोध नियुक्ती झाली.
भारतीय क्रिकेट नियामक मंडळाच्या (बीसीसीआय) स्पर्धांसाठी दक्षिण विभागीय संघ निवडण्याची जबाबदारी यंदा ‘जीसीए’कडे असेल.
दक्षिण विभागीय निमंत्रकपदी नियुक्ती झाल्याबद्दल ‘जीसीए’ व्यवस्थापकीय समितीने रोहन यांचे अभिनंदन केले आहे. आगामी दुलिप करंडक, तसेच प्रा. देवधर करंडक क्रिकेट स्पर्धेसाठी दक्षिण विभागीय संघ निवड समितीची बैठक रोहन यांच्या अध्यक्षतेखाली होईल.
याशिवाय 14 वर्षांखालील दक्षिण विभागीय स्पर्धा केंद्र ठरविण्याची जबाबदारीही ‘जीसीए’वर असेल. दक्षिण विभाग क्रिकेट संघटनांची आभासी पद्धतीने बैठक झाली, त्यावेळी रोहन यांच्या निवडीवर एकमताने शिक्कामोर्तब झाले.
दक्षिण विभागात गोव्यासह कर्नाटक, हैदराबाद, आंध्र, तमिळनाडू, केरळ व पुदुचेरी या क्रिकेट संघटनांचा समावेश आहे.
दुलिप करंडक क्रिकेट स्पर्धा 28 जून ते 16 जुलै या कालावधीत, तर देवधर करंडक एकदिवसीय सामन्यांची स्पर्धा 24 जुलै ते 3 ऑगस्ट या कालावधीत खेळली जाईल. या दोन्ही स्पर्धेत मध्य, दक्षिण, उत्तर, पूर्व, पश्चिम व ईशान्य असे सहा संघ सहभागी होतील.
त्यापैकी दक्षिण विभागीय संघ निवडण्यासाठी बैठक बोलावण्याचा अधिकार रोहन यांच्याकडे असेल. गतवर्षीच्या दुलिप करंडक स्पर्धेत दक्षिण विभाग संघ उपविजेता ठरला होता.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
