Bengaluru Stampede: RCB चाहत्यांच्या मदतीला धावली!! मृतांच्या कुटुंबियांना करणार प्रत्येकी 10 लाखांची मदत

IPL 2025 Stampede Compensation: आयपीएल २०२५ मध्ये रॉयल चॅलेंजर्स बंगळूरुच्या ऐतिहासिक विजयाचा जल्लोष बंगळूरु शहरासाठी एक मोठी शोकांतिका ठरला. बुधवारी (४ जून) चिन्नास्वामी स्टेडियमबाहेर झालेल्या भीषण चेंगराचेंगरीत ११ निष्पाप चाहत्यांचा बळी गेला असून, अनेक जण जखमी झाले आहेत. या घटनेमुळे आरसीबी कुटुंब अत्यंत व्यथित झाले असून गुरुवारी (५ जून) त्यांनी मृतांच्या कुटुंबियांना प्रत्येकी १० लाख रुपयांची आर्थिक मदत जाहीर केली आहे.

'आरसीबी केअर्स' निधीतून जखमींना आधार

आरसीबी फ्रँचायझीने सोशल मीडियावर एक निवेदन जारी करत म्हटले आहे, "बंगळूरुमध्ये काल घडलेल्या दुर्दैवी घटनेमुळे आरसीबीला खूप दुःख झाले आहे" आपल्या निवेदनात त्यांनी पुढे म्हटले आहे, "आदर आणि एकजुटीचा भाग म्हणून, आरसीबीने ११ मृतांच्या कुटुंबियांना प्रत्येकी १० लाख रुपयांची आर्थिक मदत जाहीर केली आहे. याव्यतिरिक्त, या दुःखद घटनेत जखमी झालेल्या चाहत्यांना मदत करण्यासाठी 'आरसीबी केअर्स' नावाचा निधीही तयार करण्यात येत आहे."

बुधवारी आरसीबीच्या विजयाचा आनंदोत्सव साजरा करण्यासाठी आणि विराट कोहली व इतर खेळाडूंची एक झलक पाहण्यासाठी लाखो चाहते स्टेडियमबाहेर जमले होते. प्रचंड गर्दीमुळे निर्माण झालेल्या गोंधळात ही भीषण चेंगराचेंगरी झाली, ज्यामुळे ११ जणांचा बळी गेला.

जखमींची प्रकृती स्थिर, बहुतेक रुग्णालयातून डिस्चार्ज

या घटनेतील जखमींपैकी बहुतेक जणांना रुग्णालयातून डिस्चार्ज देण्यात आला आहे. अजूनही काही जखमींवर उपचार सुरू असले तरी, ते धोक्याबाहेर असल्याची माहिती डॉक्टरांनी दिली आहे. बंगळूरुच्या बोअरिंग अँड लेडी कर्झन रुग्णालयात एकूण १० रुग्ण दाखल करण्यात आले होते, त्यापैकी गुरुवारी केवळ दोघांवर उपचार सुरू होते, असे वैद्यकीय अधीक्षकांनी सांगितले.

चिन्नास्वामी स्टेडियमबाहेरील चेंगराचेंगरीनंतर या रुग्णालयात एकूण १८ रुग्णांवर उपचार करण्यात आले होते, अशी माहिती वैद्यकीय अधीक्षक टी. केम्पराजू यांनी दिली. आरसीबीने घेतलेल्या या निर्णयामुळे दुःखितांना काही प्रमाणात दिलासा मिळेल अशी अपेक्षा आहे. या दुर्घटनेमुळे आरसीबीच्या पहिल्या आयपीएल विजेतेपदाच्या आनंदावर दुःखाचे सावट पसरले आहे.