RCB Fan Death: फक्त ट्रॉफी नाही, दुःखही घेऊन आला! RCB च्या विजयाने एका कट्टर चाहत्याचा जीव घेतला

मुधोळ: इंडियन प्रीमियर लीग २०२५ च्या अंतिम सामन्यात रॉयल चॅलेंजर्स बंगळूरुच्या विजयाचा जल्लोष कर्नाटकातील एका निष्ठावान चाहत्याच्या जीवावर बेतला. मुधोळ तालुक्यातील अवराडी गावात मंगळवारी (दि.३) रात्री मंजुनाथ इरप्पा कंबार (वय २८) या तरुणाचा आरसीबीच्या विजयाच्या सेलिब्रेशनदरम्यान हृदयविकाराच्या झटक्याने मृत्यू झाला. या घटनेने अवराडी गावावर शोककळा पसरली असून, एका उत्साही आणि तरुण क्रिकेटप्रेमीच्या अकाली निधनामुळे हळहळ व्यक्त होत आहे.

आरसीबीच्या 'आनंदाचा अतिरेक' जीवावर

मंजुनाथ इरप्पा कंबार हा आरसीबीचा कट्टर समर्थक होता. आपल्या लाडक्या संघाला आयपीएल ट्रॉफी उचलताना पाहून तो आनंदाने वेडा झाला होता. गावातील संगोल्ली रायण्णा सर्कलजवळ मित्रांसोबत आरसीबीच्या विजयाचा जल्लोष करताना, नाचत असतानाच तो अचानक कोसळला. त्याला तात्काळ जवळच्या महालिंगापूर येथील एका खासगी रुग्णालयात नेण्यात आले, परंतु डॉक्टरांनी त्याला मृत घोषित केले.

मंजुनाथ हा एक क्रिकेटप्रेमी होता. आरसीबीच्या विजयाचा उत्सव साजरा करण्यासाठी त्याने कोणतीही कसर सोडली नव्हती. त्याने सार्वजनिकपणे सामना पाहण्यासाठी मोठी एलईडी स्क्रीन लावली होती आणि गेल्या चार दिवसांपासून या कार्यक्रमाची तयारी करत होता.

सर्व काही व्यवस्थित असावे यासाठी त्याने जेवण आणि झोपही सोडली होती, असे सांगितले जात आहे. उत्सवासाठी त्याने फटाके आणि रंगाचीही व्यवस्था केली होती.

'अवराडी वॉरियर्स'चा संस्थापक, कुटुंबावर दुःखाचा डोंगर

मंजुनाथ हा 'अवराडी वॉरियर्स' नावाच्या स्थानिक क्रिकेट संघाचा संस्थापक होता आणि तो गावातील स्पर्धांमध्ये सक्रियपणे भाग घेत असे. त्याच्या लाडक्या संघाने आयपीएल ट्रॉफी जिंकल्याने त्याला आनंदाचा इतका आवेग आला की, त्यातच त्याला हृदयविकाराचा झटका आला.

मंजुनाथच्या पश्चात त्याची गर्भवती पत्नी आणि सहा महिन्यांची लहान मुलगी आहे. त्याचे वडील इरप्पा हे शेतकरी आहेत. या तरुण आणि आशादायक आयुष्याचा असा अचानक अंत झाल्याने कुटुंबियांवर आणि मित्रांवर दुःखाचा डोंगर कोसळला आहे. अवराडी गावात सर्वत्र हळहळ व्यक्त होत असून, या घटनेने आयपीएलच्या विजयाचा आनंदही शोकात बदलला आहे.