तुये येथील गोवा अँटीबायोटिक्स फार्मास्युटिकल्स लिमिटेडच्या कामगारांनी कंपनीच्या गेटबाहेर एक दिवसाचे धरणे आंदोलन केले. गेल्या अडीच महिन्यांचे प्रलंबित वेतन देण्यात यावे, अशी मागणी त्यांनी केली. ‘आमचो पगार आमका जाय, ऑल इंडिया कमर्शियल ट्रेड युनियन जिंदाबाद, कामगारांचो एकवट जिंदाबाद, लाल बावटा जिंदाबाद’ अशा घोषणा कामगारांनी यावेळी दिल्या.

ऑल इंडिया कमर्शियल ट्रेड युनियनचे नेते क्रिस्तोपर फोसेंको म्हणाले की, पेडणे तालुक्यातील लोकांना या कंपनीत नोकरी मिळून लोकांचे भले व्हावे या उद्देशाने गोवा अँटिबायोटिक्स फार्मास्युटिकल्स सुरू केली होती. पण, सध्या या कंपनीकडून कामगारांना काम करूनही वेळेवर वेतन दिले जात नाही. काही महिन्यांपूर्वी आमदार जीत आरोलकर यांनी या प्रश्नासंबंधी मुख्यमंत्री प्रमोद सावंत यांची भेट घेतली होती.