चिंबल येथील प्रस्तावित असलेल्या 'युनिटी मॉल' प्रकल्पाचा वाद आता अधिक चिघळला असून, सोमवारी (26 जानेवारी) बांबोळी येथे हायव्होल्टेज ड्रामा पाहायला मिळाला. या प्रकल्पाला विरोध करण्यासाठी चिंबल आणि परिसरातील ग्रामस्थ मोठ्या संख्येने रस्त्यावर उतरले होते. मात्र, आंदोलकांनी नियोजित स्थळाकडे कूच करु नये, यासाठी प्रशासनाने बांबोळी परिसरात प्रचंड पोलीस फौजफाटा तैनात केला.

आंदोलक आणि पोलिसांमध्ये यावेळी जोरदार बाचाबाची झाली. "हा प्रकल्प पर्यावरणासाठी घातक असून आमची जमीन हडपण्याचा हा प्रकार आहे," असा आरोप ग्रामस्थांनी केला. परिस्थिती हाताबाहेर जाऊ नये म्हणून पोलिसांनी बॅरिकेड्स लावून आंदोलकांना रोखून धरले. दरम्यान, मुख्यमंत्री डॉ. प्रमोद सावंत यांनी आंदोलकांना शांततेचे आवाहन केले असून, 27 जानेवारीपर्यंत संयुक्त सर्वेक्षण पूर्ण होईपर्यंत संयम राखण्यास सांगितले आहे. सध्यातरी बांबोळी परिसरात तणावपूर्ण शांतता असून सुरक्षेच्या कारणास्तव पोलीस तैनात आहेत.