आरोग्यमंत्री विश्वजीत राणे यांनी मोठी घोषणा करताना सांगितले की, आगामी २०२७ विधानसभा निवडणुकांपूर्वी दक्षिण गोवा जिल्हा रुग्णालय पूर्ण क्षमतेने कार्यान्वित केले जाईल. हे रुग्णालय अवघ्या तीन महिन्यांतही तयार होऊ शकते, असे सूचक विधान त्यांनी केले. सध्या आरोग्य मंत्रालय या रुग्णालयात लागू करण्यासाठी पाच ते सहा सर्वसमावेशक प्रस्तावांवर काम करत असल्याचे त्यांनी स्पष्ट केले. आरोग्य सुविधांच्या निष्क्रियतेवर प्रश्नचिन्ह उपस्थित करणाऱ्या विरोधकांना लक्ष्य करताना ते म्हणाले की, हे मोठे वैद्यकीय केंद्र एकदा पूर्णपणे कार्यरत झाल्यावर, त्यांच्या मंत्रालयावर किंवा सरकारवर प्रश्न विचारण्याची संधी विरोधकांना मिळणार नाही.