फोंडा: ५ लाख ७४ हजारांच्या खर्चावरून रविवारी साकोर्डा ग्रामसभेत जोरदार खडाजंगी झाली. ग्रामस्थांनी या खर्चाचा तपशील सविस्तर द्यावा, अशी मागणी करत सरपंच संजना नार्वेकर आणि सचिव संदीप हल्ल्याळे यांना धारेवर धरले. वाढता गोंधळ पाहून सरपंचांनी ग्रामसभा तहकूब केली. पुढील रविवारी याच विषयावर पुन्हा ग्रामसभा घेण्यात येईल, असे सांगत त्यांनी ग्रामस्थांना शांत केले.

या सभेला उपसरपंच जितेंद्र कालेकर, पंच शिरीष देसाई, महादेव शेटकर, गायत्री मापारी, प्रिया खांडेपारकर, सोनू गावकर उपस्थित होते. ग्रामस्थांच्या मते, पंचायतीने गटारे आणि बुश कटिंगच्या कामांसाठी ५.७४ लाख खर्च दाखवला असला, तरी अनेक कामे प्रत्यक्ष झाली नाहीत. काही बिले बिगरगोमंतकीय व्यक्तींच्या नावाने दाखवली गेल्याचा आरोप करण्यात आला. सरपंचांकडे संबंधित तपशील नसल्याने ग्रामस्थांनी पुढील सभेत संपूर्ण हिशोब सादर करण्याची मागणी केली आहे.