डिचोली: औषधी गुणधर्म आणि नैसर्गिक जलस्रोत असलेली सर्वण गावातील नैसर्गिक ‘झर’ सध्या संकटात आली असून, ही झर जवळपास नामशेष होण्याच्या वाटेवर आहे. निसर्गाचे वरदान असलेल्या या ‘झरी’च्या तोंडावरील कठडा खचला असून, पाण्याचा प्रवाह एकदम मंदावला आहे. झरीतील पाणीही आटले असून, झरीवर प्रदूषणाचे संकट ओढवले आहे. त्यामुळे या झरीच्या अस्तित्वाबाबत प्रश्नचिन्ह निर्माण होत आहे.

डिचोली तालुक्यातील सर्वण गावातील श्री श्यामपुरुष मंदिरापासून साधारण एक किलोमीटर अंतरावर ही नैसर्गिक झर आहे. वाठादेव येथून या ‘झरी’चा उगम झाल्याचा जाणकारांचा दावा आहे. स्थानिक पंचायत किंवा अन्य यंत्रणा ही झर वाचविण्यासाठी पुढे येत नसल्याने, या झरीचे अस्तित्व संकटात आले आहे. नैसर्गिक देणगी असलेल्या या झरीच्या संवर्धनासाठी वेळीच प्रयत्न झाले नाहीत, तर ही झर नामशेष होणार यात तिळमात्रही शंका नाही. झर नामशेष झालीच, तर भविष्यात गावात ‘एक होती झर’ असे म्हणण्याची वेळ येणार आहे. आठ वर्षांपूर्वी जलस्रोत खात्याकडून निसर्गाचे वरदान असलेल्या या झरीची पाहणी करण्यात आली होती. पण अद्याप काहीच हालचाल करण्यात आली नाही.

स्थानिकांची झरीकडे पाठ

एकेकाळी म्हणजेच २५-३० वर्षांपूर्वी या झरीवर सदैव गजबज दिसून येत असे. गावातील लहानथोर मिळून बहुतेकजण आंघोळीसाठी या झरीवर जात होते. संध्याकाळच्यावेळी तर या झरीवर आंघोळीसाठी गर्दी दिसून येत होती. मात्र, झरीची देखभाल किंवा बांधणी करण्याकडे कोणीच लक्ष दिले नसल्याने हळूहळू या झरीच्या प्रवाहावर परिणाम होत गेला. त्यातच दगड, माती आदी पालापाचोळ्यामुळे झर बुजत गेली. पाणीही प्रदूषित होत गेल्याने स्थानिकांनी हळूहळू या झरीकडे पाठ केली. आता तर या झरीवर कोणीच जात नाहीत.