मोपा येथील मनोहर आंतरराष्ट्रीय विमानतळावर टॅक्सी ऑपरेटर आणि विमानतळ व्यवस्थापन (GMR) यांच्यातील वाद विकोपाला गेला आहे. जीएमआरने प्रत्येक टॅक्सीसाठी २१० रुपये पिक-अप शुल्क आकारण्याचा आणि त्यासाठी केवळ २ मिनिटांची वेळ मर्यादा देण्याचा निर्णय घेतल्याने टॅक्सी चालकांनी आक्रमक पवित्रा घेतला आहे. या निर्णयाच्या निषेधार्थ चालकांनी विमानतळाचे मुख्य प्रवेशद्वार रोखून धरल्याने परिसरात तणावाचे वातावरण निर्माण झाले.

टॅक्सी चालकांच्या या आंदोलनामुळे विमानतळावर येणाऱ्या आणि जाणाऱ्या प्रवाशांना प्रचंड मनस्तापाचा सामना करावा लागला. टॅक्सींना पिक-अप झोनमध्ये प्रवेश मिळत नसल्याने अनेक पर्यटकांना आपले जड सामान घेऊन टर्मिनल इमारतीपर्यंत पायपीट करावी लागली. ऐन नाताळच्या सुट्ट्यांच्या काळात पर्यटकांची संख्या मोठी असताना, अशा प्रकारे निर्माण झालेल्या गोंधळामुळे गोव्याच्या पर्यटनावरही प्रश्नचिन्ह उपस्थित केले जात आहेत.

टॅक्सी चालकांच्या मते, प्रवाशांचे सामान गाडीत भरणे आणि त्यांना व्यवस्थित बसवणे यासाठी किमान ५ ते १० मिनिटे लागतात. मात्र, जीएमआरने केवळ २ मिनिटांची मर्यादा दिली असून, त्यापेक्षा जास्त वेळ लागल्यास अव्वाच्या सव्वा शुल्क आकारले जात आहे. हे शुल्क आणि वेळ मर्यादा दोन्ही अव्यवहार्य असल्याचे चालकांचे म्हणणे आहे. या आंदोलनामुळे विमानतळ परिसरात वाहनांच्या लांबच लांब रांगा लागल्या होत्या.