दिवंगत माजी मुख्यमंत्री रवी नाईक यांच्या श्रद्धांजली सभेत राज्याचे आरोग्यमंत्री विश्वजीत राणे हे आपल्या भावना आवरू शकले नाहीत आणि एका भावनिक क्षणी त्यांनी रवी नाईक यांनी केलेल्या मदतीची आठवण सांगितली.

मंत्री राणे म्हणाले की, अनेक वर्षांपूर्वी त्यांचे वडील तथा माजी मुख्यमंत्री प्रतापसिंह राणे यांना हृदयविकाराचा तीव्र झटका आला होता. तो अत्यंत कठीण काळ होता, पण त्यावेळी रवी नाईक यांनी तातडीने सूत्रे हलवली.

रवी नाईक यांनी विमानाने बाहेरील डॉक्टरांना तातडीने गोव्यात बोलावले. त्यांच्या या त्वरित मदतीमुळे आणि प्रयत्नांमुळेच आपल्या वडिलांचे प्राण वाचले, असे विश्वजीत राणे यांनी नमूद केले. रवी नाईक यांनी केलेल्या या मदतीबद्दल कृतज्ञता व्यक्त करताना मंत्री राणे गहिवरले. एका राजकीय नेत्यापेक्षा माणूस म्हणून रवी नाईक किती महान होते, हे या आठवणीतून स्पष्ट होते.