मोपा: उत्तर गोव्यातील मनोहर आंतराष्ट्रीय विमानतळावर पुन्हा एकदा स्थानिक टॅक्सी चालक आणि रेंट अ कॅब चालकांमध्ये वाद झाला. यावेळी मोपा विमानतळावर रेट कॅबवाल्यांनी भाडी मारू नये ,अशी जोरदार मागणी स्थानिक टॅक्सी चालकांनी केलीये. एका रेंट अ कॅब चालकाकडून स्थानिक टॅक्सी चालकावर हल्ला केल्यानंतर हे पाऊल उचललं असल्याचं टॅक्सी चालकांनी सांगितलं आहे.

स्थानिक टॅक्सी चालकांनी दिलेल्या माहितीनुसार एका रेंट अ कॅब चालकाने मोपा विमानतळावर कॅब आणताच त्याला स्थानिक टॅक्सी चालकाने विमानतळावर रेंट अ कॅबला परवानगी नसल्याचं सांगत तिथून जाण्याची विनंती केली. मोपा विमानतळावर असलेल्या एक सुरक्षा अधिकाऱ्याच्या मदतीनेच ही माहिती पोहोचवली गेली असल्याचं स्थानिक टॅक्सी चालक सांगतात.

मात्र यावरून आक्रमक पवित्रा धारण करत रेंट अ कॅब चालवणाऱ्या चालकाने स्थानिक टॅक्सी चालकावर हल्ला केला. स्थानिक टॅक्सी चालकांना विनाकारण या प्रकरणात अडकवलं जातंय आणि कारण नसताना त्यांच्या विरोधात पोलीस तक्रार दाखल केली असल्याचं त्यांचं म्हणणं आहे.