हैदराबाद, अमीरपेठ येथील २३ वर्षीय शेख परवेझ या तरुणाचा सोमवारी (दि. १७) सायंकाळी कळंगुट समुद्रकिनाऱ्यावर बुडून मृत्यू झाला. तो आपल्या पाच मित्रांसोबत समुद्रात आनंद घेत असताना, प्रवाह तीव्र असल्याने तो वाहून गेला. परवेझचा मित्र मोहम्मद इब्राहिम वाचवण्यासाठी गेला असता तोही बुडू लागला, पण जीवरक्षकांनी त्याला वाचवले आणि तो सध्या कांदोळी पीएचसीमध्ये उपचार घेत आहे. परवेझ खोल पाण्यात बेपत्ता झाला असून, कळंगुट पोलीस, कोस्टल पोलीस आणि जीवरक्षकांनी बागा बीच परिसरात तीव्र शोध मोहीम सुरू केली आहे.