Harvalem Panchayat Election

डिचोली: डिचोली तालुक्यातील हरवळे पंचायतीसाठी निवडणूक होत असून निवडणूक यंत्रणा सज्ज झाली आहे. हरवळे पंचायतीच्या चार प्रभागांसाठी निवडणूक होत असून १२ उमेदवार आपले भवितव्य अजमावीत आहेत. सकाळी ८ ते सायंकाळी ५ या वेळेत मतदान होणार आहे. डिचोलीचे मामलेदार प्रवीण गावस निर्वाचन अधिकारी म्हणून, तर दत्तात्रय परब यांची साहाय्यक निर्वाचन अधिकारी म्हणून नियुकी करण्यात आली आहे.

मतदान प्रक्रिया सुरळीतपणे पार पडण्यासाठी मतदान केंद्रे सज्ज झाली असून मतदान केंद्रावर नियुक्त केलेल्या कर्मचाऱ्यांनी मतदान केंद्राचा ताबा घेतला आहे. प्रभाग-२ साठी (सरकारी प्राथमिक शाळा, वरचे हरवळे, उत्तर विभाग), प्रभाग-३ साठी (गणेश विद्यालय, हरवळे), प्रभाग-४ साठी (सरकारी प्राथमिक शाळा, प्रतापनगर - हरवळे) आणि प्रभाग-५ साठी (सरकारी प्राथमिक शाळा, वरचे हरवळे, दक्षिण विभाग) याप्रमाणे मतदान केंद्रे स्थापन करण्यात आली आहेत.

१,६२१ मतदारांना हक्क

हरवळे पंचायतीत एकूण १ हजार ९९१ मतदारांची नोंद झाली आहे. चार प्रभागांतून प्रत्यक्षात १,६२१ मतदारांना मतदानाचा हक्क मिळणार आहे. प्रभाग-२ मध्ये ४५३ (महिला - २२५ आणि पुरुष - २२८ मतदार). प्रभाग-३ मध्ये २९७ (महिला - १५२ आणि पुरुष - १४५ मतदार). प्रभाग-४ मध्ये ४९० (महिला - २६२ आणि पुरुष - २२८ मतदार). प्रभाग-५ मध्ये ४८१ (महिला - २३७ आणि पुरुष - २४४ मतदार) या मतदारांना मतदानाचा हक्क बजावता येणार आहे.