गोव्यात अनेक वर्षांपासून नवरात्रीच्या काळात महालक्ष्मी पूजन केलं जातं. कोकणस्थ ब्राह्मणांमध्ये लग्न झाल्यानंतर पुढील पाच वर्षांसाठी महिलांकडून हे व्रत करण्याची परंपरा आहे. सुवासिनी एकत्र येत सकाळी देवीची पूजा करतात आणि संध्याकाळी महालक्ष्मीची मूर्ती पूजनासाठी तयार केली जाते. वैशिष्टय म्हणजे ही महालक्ष्मीची मूर्ती नेहमीच उभ्या स्वरूपात असते आणि यात कधीही बदल केला जात नाही. काही ठराविक माणसांकडून तांदळाच्या उकडीपासून देवीचा मुखवटा बनवला जातो. व्रताच्या दिवशी संध्याकाळी ते दुसऱ्या दिवशी पहाटेपर्यंत फुगड्यांच्या कार्यक्रमातून महालक्ष्मी जागवली जाते आणि पहाटे मुखवट्याचं विसर्जन करत, व्रताचं उद्यापन केलं जातं. नगरगावतील लक्ष्मी-नारायणाच्या मंदिरात गेल्या ३६ वर्षांपासून ही परंपरा सुरु आहे. केवळ नगरगावताच नाही तर गोव्यातील इतरत्र ठिकाणी देखील हा उत्सव साजरा केला जातो.