गोवा विधानसभेच्या हिवाळी अधिवेशनाचा सोमवारी (12 जानेवारी) दिमाखात प्रारंभ झाला. अधिवेशनाच्या पहिल्याच दिवशी राज्यपाल पुसापती अशोक गजपती राजू यांनी आपल्या अभिभाषणातून राज्याच्या प्रगतीचा लेखाजोखा मांडला. गोव्याच्या सर्वांगीण विकासासाठी आणि 'विकसित भारत 2037' चे ध्येय गाठण्यासाठी सरकारने उचललेली पावले, कायदा-सुव्यवस्थेची स्थिती आणि नवीन जिल्हा निर्मितीची घोषणा हे त्यांच्या भाषणाचे मुख्य केंद्रबिंदू ठरले.

राज्यातील कायदा व सुव्यवस्थेवर भाष्य करताना राज्यपालांनी गोवा पोलिसांच्या कामगिरीचे कौतुक केले. राज्यात गुन्ह्यांचा शोध घेण्याचे प्रमाण (Crime Detection Rate) 87.72% इतके उच्च आहे, जे देशातील सर्वोत्तम कामगिरीपैकी एक आहे.