पणजी: वेदान्‍ता आयर्न ॲण्‍ड स्टील लिमिटेड (व्हीआयएसएल) या कंपनीने सुमारे १६,५०० कोटी रुपयांचे संभाव्य दायित्व उघड केले नसल्याचा आरोप करत गोवा प्रदेश काँग्रेस अध्यक्ष गिरीश चोडणकर यांनी भारतीय रोखे आणि विनिमय मंडळाकडे (सेबी) तक्रार दाखल केली आहे.

पत्रकार परिषदेत बोलताना चोडणकर म्हणाले की, वेदान्‍ता लिमिटेडमधून विभाजित झालेली व्हीआयएसएल कंपनी १५ जून रोजी शेअर बाजारात सूचीबद्ध होणार आहे. मात्र गोव्यातील जनतेशी संबंधित कथित आर्थिक दायित्वाचा खुलासा होईपर्यंत कंपनीचे सूचीकरण रोखावे, अशी मागणी चोडणकर यांनी केली.

गोव्यातील खनिज संपत्तीशी संबंधित संभाव्य आर्थिक जबाबदारीबाबत कंपनीने संपूर्ण माहिती जाहीर करावी तसेच गुंतवणूकदार आणि जनतेच्या हिताचे संरक्षण करण्यासाठी सेबीने हस्तक्षेप करावा, असेही त्यांनी नमूद केले.